Ҳоло дар шаҳру ноҳияҳои Вилояти Мухтори Кӯҳистони Бадахшон 91 муассисаи фарҳангӣ таъмирталаб буда, 37 адади онҳо дар ҳолати садамавӣ қарор доранд.

Тавре Силкабек Одинаев, сармутахассиси Шуъбаи фарҳанги вилоят дар нишасти хабарӣ иброз дошт, қисми зиёди муассисаҳои фарҳангӣ бар асари заминларзаи соли 2017 зарар дида, фавран ба навсозӣ ниёз доранд.

- Маҳз мушкили камчинии маблағ боис мегардад, ки муассисаҳо давоми чанд сол дар ҳолати ногувор қарор доранд, ё аз таъмири асосӣ бароварда нашуданд, - мегӯяд, - С. Одинаев.

Инчунин дар вилоят баъзе мактабҳои санъат бинои худро надошта, барои теъдоде аз китобхонаҳои ноҳияҳои Дарвоз, Рӯшону Ишкошим дар муассисаҳои таълимии навоҳӣ, хонаҳои хусусӣ ва вагонҳои бекор ҷойи муваққатӣ дода шудааст.

Дар доираи Барномаи рушди муассисаҳои фарҳангӣ дар Ҷумҳурии Тоҷикистон барои солҳои 2016 - 2020 солҳои охир қасрҳои фарҳанг дар ноҳияҳои Ванҷу Шуғнон сохта ба истифода дода шуда, то ҷашни 30 - солагии Истиқлолият иловатан ду қасри фарҳанг дар ноҳияҳои Роштқалъаву Ишкошим мавриди баҳрабардорӣ қарор мегирад.

Қайд гардид, ки ҳоло китобхонаҳои вилоятию шаҳрӣ аз набудани баъзе китобҳои тозанашр танқисӣ кашида, ин масъала бояд дар сатҳи Вазорати фарҳанги кишвар ва дигар идораҳои марбут ҳалли худро ёбад.

Дар самти иҷора гирифтани асбобҳои мусиқӣ дар ҳар чорабинӣ агар қаблан масъулини фарҳанги вилоят то 3 ҳазор сомонӣ ба иҷорадиҳанда пардохт менамуданд, ҳозир бошад масъулин зиёда аз 5 ҳазор сомонӣ медиҳанд, ки ин вазъ мушкилоти соҳаро дучанд кардааст.
Масъалаи ба Раёсати фарҳанг табдил додани шуъбаи вилоятӣ низ ҳалли худро наёфта, 4 корманди шуъба ҳоло ҳам 8 бахши шаҳру ноҳиявиро мувофиқи талабот сарпарастӣ карда наметавонад.

Дар робита ба фаъолияти қасрҳои фарҳангӣ дар ноҳияҳо С. Одинаев афзуд, ки қасри фарҳанги ноҳияи Дарвоз ба талаботи корӣ ҷавобгӯ набуда, қасрҳои фарҳанги ноҳияҳои Ванҷ, Рӯшон ва Шуғнон бо проблемаи воҳиди корӣ ва дигар мушкилоти ҷойдошта мувоҷеҳанд.

Бояд зикр намуд, ки дар бораи мушкилоти ҷойдоштаи соҳаи фарҳанги вилоят соли гузашта ҳафтаномаи “Ҷавонони Тоҷикистон” мақолаи таҳлилӣ ба табъ расонд ва дар навбати худ Вазорати фарҳанги ҷумҳурӣ низ ба он вокуниш нишон дода буд. Вале мутаассифона, мушкилоти соҳаи фарҳанги вилоят ҳоло ҳам доманадор буда, умед аст, ки дар солҳои минбаъда ҳалли худро ёбанд.