17 марти соли 2026 дар шаҳри Душанбе бахшида ба ҷашни байналмилалии Наврӯз ва дар асоси қарори Раиси шаҳр муҳтарам Рустами Эмомалӣ Форуми 5-уми байналмилалии “Наврӯзи Душанбе - меҳвари робитаҳои фарҳангию сайёҳӣ” баргузор мегардад.

Дар ин хусус аз Мақомоти иҷроияи ҳокимияти давлатии шаҳри Душанбе хабар дода, гуфтанд, ки форуми мазкур дар асоси ҷадвали “Тақвими чорабиниҳои Иди байналмилалии Наврӯз дар шаҳри Душанбе барои соли 2026” доир карда мешавад.

Ба гуфтаи масъулин мақсад аз баргузории Форум тарғиби арзишҳои умумибашарии ҷашни байналмилалии Наврӯз, рушди соҳаи сайёҳӣ, ташаккул ва муаррифии бренди миллии сайёҳӣ, инчунин, ҷалби бештари сайёҳони хориҷӣ ба Ҷумҳурии Тоҷикистон мебошад.

Инчунин, интизор меравад, ки Форум ба густариши ҳамкориҳои фарҳангию сайёҳӣ, таҳкими робитаҳои байналмилалӣ ва муаррифии имкониятҳои сайёҳии пойтахт мусоидат намояд.

Масъулин изҳор доштанд, ки дар чорабинии мазкур роҳбарияти вазорату идораҳои кишвар, намояндагони корпуси дипломатии муқими шаҳри Душанбе, ширкатҳои сайёҳӣ, олимону мутахассисони соҳа, меҳмонони хориҷӣ ва намояндагони воситаҳои ахбори омма ширкат хоҳанд кард.

Ҳамчунин, дар кори Форум аз ҷониби мутахассисони соҳа ироаи маърузаҳо доир ба оинҳои наврӯзӣ, робитаҳои фарҳангии ҷашни байналмилалии Наврӯз, муаррифии он ҳамчун бренди миллии сайёҳӣ, нақши ҷашни Наврӯз дар ҷалби таваҷҷуҳи сайёҳони хориҷӣ ва арзишҳои маърифатии умумибашарии он дар назар аст.

Тавре масъулин ёдрас шуданд, Форуми байналмилалии “Наврӯзи Душанбе – меҳвари робитаҳои фарҳангию сайёҳӣ” шуруъ аз соли 2019 ҳамасола бо ташаббуси Мақомоти иҷроияи ҳокимияти давлатии шаҳри Душанбе баргузор гардида, баҳри муаррифии ҷашни байнамилалии Наврӯз ҳамчун бренди миллии сайёҳӣ нақши муҳимро бозидааст.

Гулафшон КАРИМОВА, “ҶТ”