2 апрел, дар “Китобхонаи давлатии бачагонаи ҷумҳуриявии ба номи Мирсаид Миршакар”-и шаҳри Душанбе маросими оғози Фестивали ҷумҳуриявии “Ҳафтаи китоби кӯдакону наврасони Тоҷикистон” таҳти унвони “Кашшофи падидаҳои наврас” баргузор гардид. 

Дар маросими ифтитоҳи фестивал Шамсиддин Орумбекзода, вазири фарҳанги Ҷумҳурии Тоҷикистон иштирок намуда, меҳмононро ба фестивали мазкур табрик ва кӯдакону наврасонро барои бисёртар мутолиа намудани китобҳо даъват намуд.

Фестивал аз ҷониби Вазорати фарҳанги Ҷумҳурии Тоҷикистон ва Муассисаи давлатии “Китобхонаи давлатии бачагонаи ҷумҳуриявии ба номи Мирсаид Миршакар” дар ҳамкорӣ бо Вазорати маориф ва илми Ҷумҳурии Тоҷикистон доир шуда, дар он намояндагони вазорату идораҳои номбурда, иштирок ва аз намоиши китобҳо дидан карданд.

Ба таъкиди масъулин чорабинии мазкур бахшида ба ҷашни Истиқлолияти давлатии Ҷумҳурии Тоҷикистон, “Солҳои рушди деҳот, сайёҳӣ ва ҳунарҳои мардумӣ” гузаронида шуда, мақсад аз он ҷалби насли наврас ба мутолиаи китоб, ташаккул ва такомули беҳтарин малакаҳои хониш, боз ҳам баланд бардоштани сатҳи фарҳанги иттилоотии кӯдакону наврасон, ҷавонон ва ба ин васила дар замири онҳо тарбия намудани ҳисси ифтихори миллӣ, ватандӯстӣ, гиромидошти арзишҳои милливу умумибашарӣ мебошад.

Фестивали ҷумҳуриявии “Ҳафтаи китоби кӯдакону наврасони Тоҷикистон” аз 2 то 9 апрел дар шаҳри Душанбе ва дигар ноҳияҳо баргузор гардида, дар доираи он намоишгоҳ, суҳбатҳо, маҳфилҳои адабӣ, мизҳои мудаввар ва озмунҳои гуногун аз қабили “Фуруғи субҳи доноӣ”, “хулосаи библиографӣ доир ба намоиш”, “намоиши дастранҷи кӯдакону наврасон”, “Сайёҳони наврас”, “Саёҳат бо китоб”, “Сайри олами китоб”, маҳфилҳои “Оилаи китобдӯст”, “Синфи китобдӯст”, “Оилаи ҳунармандон”, “Дастони моҳир”, порчаҳо аз намоишномаи Театри давлатии ҷумҳуриявии “Лухтак” ва амсоли инҳо гузаронида мешаванд.