Соли 2024 шаҳри Истаравшан ба узвияти Шурои умумиҷаҳонии ҳунармандон пазируфта шуда, вобаста ба ин моҳи октябри соли 2024 нахустин Фестивали байналмилалии ҳунармандӣ "Озар" доир карда шуд.

Дар ин хусус Матлубахон Сатториён вазири фарҳанги Ҷумҳурии Тоҷикистон зимни нишасти хабарӣ иттилоъ дод.

Ҳамчунин, зикр гардид, ки дар иҷлосияи 19-уми Кумитаи байниҳукуматӣ оид ба ҳифзи мероси фарҳангии ғайримоддии ЮНЕСКО номинатсияи муштараки Тоҷикистону Эрон "Ҷашни Меҳргон" ва ҳамчунин номинатсияи дигари муштараки Тоҷикистон, Афғонистон, Эрон ва Ӯзбекистон "Санъати сохту навохтани рубоб" ба Феҳристи мероси ғайримоддии башарият ворид карда шуд.

- Айни замон корҳо дар самти таҳия ва ворид намудани номинатсияҳои "Ахтаршиносӣ/ситорашиносӣ", афсонаҳои "Ҳазору як шаб" ва "Нардбозӣ" ҳамчун бозии миллӣ ва мардумӣ, инчунин номинатсияи "Тоқӣ" ба Феҳристи репрезентативии ЮНЕСКО идома дошта, аз ҷониби Пажӯҳишгоҳи илмӣ- тадқиқотии фарҳанг ва иттилоот Феҳристи миллии мероси фарҳанги ғайримоддӣ такмил шуда истодааст, - гуфт вазири фарҳанг М. Сатториён.

Шаҳло ЭШОНОВА, “ҶТ”