2 декабр дар шаҳри Бӯстон ҳамоиши фаъолон доир гардид, ки ҳадафи он эҳёи мероси адабии ниёгон ва таҳкими худшиносии миллӣ буд.

Дар чорабинӣ Фирӯза Нуруллозода раиси шаҳри Бӯстон, Шабнам Раҳимзода, муовини якуми раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, кормандони мақомоти гуногуни маҳаллӣ ва ва ҷавонони фаъол иштирок доштанд.

Дар оғоз Фирӯза Нуруллозода раиси шаҳри Бӯстон аз дастгириҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар рушди фарҳанг ёдовар шуда, ба масъулин ҷиҳати омодагӣ ба озмунҳои ҷумҳуриявӣ ва тавсеаи маҳфилҳои “Шоҳномахонӣ” дастур доданд.

Шабнам Раҳимзода, муовини якуми раиси Кумитаи кор бо ҷавонон ва варзиши назди Ҳукумати кишвар вобаста ба худшиносии миллӣ суханронӣ карда, зикр намуд, ки “Шоҳнома”-и Абулқосим Фирдавсӣ намунаи барҷастаи худшиносии миллӣ буда, таваҷҷуҳи эҳсосии Пешвои миллат ба ин асари безавол саҳми калидӣ дар рушди маънавии ҷавонон дорад.

Таъкид гардид, ки ҳифз ва тарғиби мероси фарҳангӣ вазифаи муҳимми ҳар узви ҷомеа буда, “Шоҳнома” метавонад барои насли имрӯз мактаби шуҷоат, худогоҳӣ ва ватандорӣ гардад.

Ёдовар мешавем, ки тибқи иттилоъ бо мақсади эҳёи арзишҳо, боло бурдани маънавиёт ва ҷалби ҷавонон ба мутолиаи адабиёти классикӣ аз соли 2026 озмуни ҷумҳуриявии “Шоҳномахонӣ” роҳандозӣ мегардад. Ғолибон бо ҷоизаҳои арзанда аз Фонди махсуси Президенти Ҷумҳурии Тоҷикистон қадрдонӣ хоҳанд шуд.