ФАРҲАНГ
Ҷумъа 16 Апрел 2021 06:20
7860
2 март бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба Рӯзи модар ва бо мақсади арҷ гузоштан ба модар, дастгирӣ ва ҳавасмандгардонии ҷавондухтарону занон дар тарабхонаи “Яккасарой”-и пойтахт чорабинии идонаи фарҳангӣ таҳти унвони “Ҷамолу зиннати дунёӣ, эй зан” баргузор гардид.

Дар чорабинии мазкур намояндагони Дастгоҳи иҷроияи Президенти Ҷумҳурии Тоҷикистон, бонувони роҳбари вазорату идораҳо, ташкилоту муассисаҳо ва донишҷӯдухтарони фаъол иштирок намуданд.

Нахуст Абдулло Раҳмонзода, раиси Кумитаи кор бо ҷавонон ва варзиши назди Ҳукумати кишвар суханронӣ намуда, зимни баромади худ занону бонувон ва ҷавондухтарони кишварро бо фарорасии фасли зебои баҳор ва ҷашни фархундаи Рӯзи модар табрик кард. Ӯ зимни баромади хеш модаронро беҳтарин мавҷудоти рӯи замин хонда дар баробари эшон сар фуруд оварданро нишонаи ҷавонмардӣ хонда, гуфт:

“Зиндагӣ аз нафаси гарму дилнавози ӯ оғоз мегирад. Мо вуҷуди муқаддаси модарро аз лаҳзаҳои аввалини ҳаёт то дами вопасин фаромӯш намекунем. Модарон дар лаҳзаҳои шодиву нишот ва ғаму зиндагӣ такягоҳанд. Модар ягона мавҷудест, ки инсон меофарад. Нақши занону модарон дар таҳким ва рушди ҷомеа, бунёди оилаи хушбахт, таълиму тарбияи фарзанд ва афзоишу эътибори хонадон ниҳоят арзишманд аст. Имрӯзҳо бонувони кишвар баробари мардон номуси ватандориро бар дӯши худ гирифта, дар соҳаҳои мухталифи ҳаёти ҷомеа ғайратмандона фаъолият доранд. Бо ташаббусҳои созандаи худ Тоҷикистони маҳбубамонро муаррифӣ ва ободу зебо намуда истодаанд. Асосгузори сулҳу ваҳдати миллӣ - Пешвои миллат, Президенти кишвар муҳтарам Эмомалӣ Раҳмон нисбати зан-модар таваҷҷуҳи хоса дошта, таъкид менамоянд, ки имрӯз ҷомеаи Тоҷикистон дар симои зан на танҳо модар, хоҳар ва ҳамсар, балки сиёсатмадори шинохта, донишманди асил, сарвари муваффақ, соҳибкори саховатпеша, табиби хуб ва корманди поквиҷдону ҳомии Ватанро мебинад, ки ин мояи ифтихори ҳар яки мову шумо мебошад”.

Раиси кумита дар идома афзуд, ки маҳз модар дар қалби фарзанд меҳру муҳаббат, дӯстию рафоқат ва некию накӯкориро мекорад, то дар оянда насли наврас чун ашхоси масъулиятшиносу меҳнатқарин ва ватанпарвар ба камол расад.

- Зеро моҳияти зан-модар, ки меҳвари асосии ҳар хонадон мебошад, аз рӯзи азал вазифаи муқаддас ва басо масъулиятнок, тарбияи инсон ва дар ниҳоди ӯ ҷойгир намудани ахлоқи ҳамида ва шавқату муҳаббат гузошта шудааст. Боиси хушнудист, ки дар даврони соҳибистиқлолӣ занону бонувони саодатманди ҷумҳурӣ бо нерую қувваи тавонои созандагӣ сарбаландона барои пешрафту ободонии кишвар саҳми арзандаи худро мегузоранд, - илова кард, Абдулло Раҳмонзода.

Сипас Гулҷаҳон Абдуфаттоҳзода, сардори Раёсати рушди иҷтимоии Дастгоҳи иҷроияи Президенти Ҷумҳурии Тоҷикистон зимни суханрониаш ҳамаи бонувон, модарон ва хоҳаронро ба ифтихори таҷлили Рӯзи модар самимона табрик гуфта, таъкид намуд, ки воқеан зан-модар чун баҳор пурнакҳату муаттар, сарсабзу хуррам ва шодону шукуфон буда, бо омади фасли баҳор ва арафаи соли нави аҷдодӣ, яъне ҷашни Наврӯз тавъам омадани Рӯзи модар дар кишвари зебову офтобрӯяи Тоҷикистони соҳибистиқлол рамзи нек аст, яъне соли нави мо бо арҷ гузоштан ва мақому манзалат, қадру қимат, ҳурмату эҳтироми модарону занони иззатманду меҳрубони мо шурӯъ мешавад.

- Боиси хурсандист, ки дар даврони соҳибистиқлолии кишвари азизамон занону духтарони саодатманди ҷумҳурӣ бо неруи тозаи созандагӣ сарбаландона барои пешрафту ободии кишвар саҳми арзандаи худро мегузоранд. Дар Пайёми имсолаи Президенти кишвар муҳтарам Эмомалӣ Раҳмон мавқеи занон ҷойгоҳи хоса дошт. Зеро Сарвари давлат чун ҳамеша занонро неруи созандаи ҷомеа ва пешбарандаи кишвар хонда, нақши онҳоро дар ҳама соҳаҳои ҳаётан муҳим баланд арзёбӣ намуд. Сол аз сол таваҷҷуҳу ғамхориҳои Президенти кишвар нисбат ба занону бонувон зиёд гардида, баҳри баланд бардоштани мақому манзалати бонувон ва занон, ҷалби онҳо ба хизмати давлатӣ, пешбарӣ намудани бонувони лаёқатманд бо вазифаҳои роҳбарикунанда, аз ҷониби Ҳукумати Ҷумҳурии Тоҷикистон чораю тадбирҳои зарурӣ андешида мешавад. Имрӯз нақши занон дар ҷомеа хеле зиёд ва ин боиси ифтихори бонувон аст,- афзуд, Гулҷаҳон Абдуфаттоҳзода.
Сипас аз тарафи гурӯҳи овозхонони ба чорабинӣ даъватшуда, барномаи фарҳангию фароғатӣ пешниҳод гардида, ҳунармандони маъруфи кишвар бо хондани сурудҳо дар васфи зан-модар, ҳифзи арзишҳои миллӣ, муҳаббат ва ҷавонӣ табъи иштирокчиёнро болида сохтанд.

Дар фарҷом ба иштирокчиёни чорабинӣ туҳфаҳои хотиравии бо рамзи миллӣ омодашуда, тақсим карда шуд.

Наҷиба МУРОДБЕКОВА,
Саида НАРЗИЗОДА, “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2

Апрел 2021 c.