18 апрел дар боғи фарҳангӣ-фароғатии шаҳри Бустон ба номи устод Садриддин Айнӣ барои дӯстдорони китоб таҳти унвони “Китоб калиди дониш” маҳфили илму адабӣ баргузор гардид. Дар маҳфил гирандагони Стипендияи президентӣ, волонтёрон ва сокинони шаҳр иштирок доштанд.

Тавре масъулин иброз доштанд, ҳадаф аз баргузор намудани чунин маҳфилҳо ин пеш аз ҳама баланд бардоштани савияи дониш барои боз ҳам тақвият бахшидани ҷаҳони маънавӣ ва нерӯи фикронии ҷавонону наврасон, дарёфти чеҳраҳои нави сухандон ва нотиқон инкишофи қобилияти эҷодӣ мебошад.

Бояд тазаккур дод, ки тибқи нақша-чорабиниҳои тасдиқнамудаи Бахши кор бо ҷавонон ва варзиши шаҳри Бӯстон, баҳри иҷро ва ба амал овардани амри Президенти Ҷумҳурии Тоҷикистон, муҳтарам Эмомалӣ Раҳмон вобаста ба баргузории озмуни ҷумҳуриявии “Фурӯғи субҳи доноӣ китоб аст” чунин маҳфилҳо роҳандозӣ шудаанд. Ҳамчунин барои ҷалб намудан ва ҳавасманд намудани диққати ҷавонону наврасон ба китоб, баланд бардоштани сатҳи саводнокӣ ҳафтае ду маротиба дар шаҳри Бустон чунин маҳфил барпо мегарданд.

Таҳмина ЮСУФОВА, коромӯзи “ҶТ”