Идораи рӯзномаи “Хатлон” таҳти унвони “Рисолати муҳаррир” маҷмааи наверо аз чоп баровард.

Дар ин хусус гурӯҳи фейсбукии рӯзномаи “Хатлон” иттилоъ дод.

Ба иттилои манбаъ маҷмуаро Носирҷон Маъмурзода, сармуҳаррири рӯзномаи “Хатлон” ва Саттор Қарахонов, котиби масъули рӯзномаи мазкур таълиф карданд.

Китоб аз 118 саҳифа иборат буда, ба фаъолияти бисёрсола ва самарабахши муҳаррирони номдори нашрияи вилоятии “Хатлон” бахшида шудааст.

Инчунин маводи он аз мусоҳибаву очеркҳо иборат буда, ҳаёт ва фаъолияти муҳарриронро бозгӯ мекунад.

Таъкид мегардад, ки рӯйи чоп омадани маҷмуаи нави идораи рӯзномаи “Хатлон” ба истиқболи 95-умин солгарди таъсиси нахустин нашрияи вилоятӣ рамзи эҳтирому арҷгузорӣ ба заҳмати муҳаррирони он ва шогирдони мактабҳои ташаккулёфтаи эҷодии онҳо мебошад.

Зимнан китоби мазкур барои мутолиа ва баҳрабардорӣ ба рӯзноманигорон, донишҷӯёни ихтисосҳои рӯзноманигорӣ ва алоқамандони публитсистикаи тоҷик пешниҳод карда мешавад.

Гулафшон КАРИМОВА,“ҶТ”