Филми ҳунарии “Бачаи обӣ”-и Муассисаи давлатии “Тоҷикфилм” бо коргардонии Файзулло Файзов дар ҷашнвораи байналмиллалии “Пуне”-и кишвари Ҳиндустон иштирок мекунад. Дар ин бора коргардон дар саҳифаи фейсбукии худ иттилоъ додааст.

Филми “Бачаи обӣ” дар жанри драмаи иҷтимоӣ офарида шуда, аз рӯзгори наврасе қисса мекунад, ки ба моҳигирӣ шавқ дошта, мехоҳад оянда ба ин касб шуғл варзад. Инчунин, филм масоили муҳити зист, кам шудани захираҳои об ва хушкшавии рудхона, кӯлу дарёҳоро дар робита ба гармшавии глобалии иқлим инъикос менамояд.

Ёдовар мешавем, ки филми мазкур соли гузашта низ иштирокидори ҷашнвораи бонуфузи “Калкутта” дар Ҳиндустон буд ва чанде пеш дар синамоҷашнвораи байналмилалии кишварҳои ИДМ-и шаҳри Москва - “Московская премьера” ширкат намуда, миёни даҳҳо филм аз кишварҳои олам, ду ҷоиза “Беҳтарин филм” ва “Беҳтарин нақши мардона”-ро ба даст овард.