Бо дастури Асосгузори сулҳу Ваҳдати миллӣ – Пешвои миллат, муҳтарам Эмомалӣ Раҳмон имсол аз 21 то 26 август Рӯзҳои фарҳангии ВМКБ дар вилояти Суғд гузаронида мешавад.

Ба ин мақсад рӯзи 21 август аҳли фарҳанг, намояндагони мақомоти иҷроияи маҳаллии ҳокимияти давлатии ВМКБ, адибону зиёиён, Раёсати кор бо ҷавонон ва бахшҳои он ва дар умум ҳамаи иштирокчиёни Ҳафтаи фарҳанги ВМКБ дар вилояти Суғдро сокинони ноҳияи Айнӣ зери садои карнаю сурнай бо нону шириниҳо гарму самимӣ истиқбол намуданд.

Ба иттилои Масрур Ғайратов, мудири Бахши кор бо ҷавонон ва варзиши ноҳияи Ванҷ меҳмонони бадахшонӣ дар назди муҷассамаи шоири маъруфи тоҷик Нақибхон Туғрали Аҳрорӣ гулдастаҳо гузошта, мақбараи шоирро зиёрат намуданд.

Пас аз анҷоми барномаи фарҳангӣ беш аз 800 нафар меҳмонони ВМКБ дар ҳайати чор гурӯҳ аз ноҳияи Айнӣ ба шаҳрҳои Хуҷанд, Панҷакент, Истаравшан ва ноҳияи Ҷаббор Расулов сафар карданд.

Гурӯҳи иштирокчиёни Ҳафтаи фарҳанги ВМКБ дар вилояти Суғд имрӯз, 22 август, ба шаҳри Хуҷанд сафар намуда, дар назар аст, ки аз Минтақаи озоди иқтисодии “Суғд”, Донишгоҳи давлатии Хуҷанд ба номи академик Бобоҷон Ғафуров, Маҷмааи таърихию фарҳангии “Қалъаи Хуҷанд”, маркази таълимӣ-истеҳсолии “Дугонаҳо” боздид менамоянд.

Гурӯҳи дуюм бошад, дар шаҳри Панҷакент қарор доранд ва аз Осорхонаи ҷумҳуриявӣ-таърихӣ ва кишваршиносии ба номи устод Абӯабдуллоҳи Рӯдакӣ ва мавзеи таърихии Саразм боздид намуда, дар маҳфили адибон дар толори муассисаи таҳсилоти миёнаи умумии №71 шаҳр ва барномаи фарҳангӣ дар назди муҷассамаи Исмоили Сомонӣ иштирок менамоянд.

Ба ҳамин тартиб дар баробари баргузории барномаҳои фарҳангӣ гурӯҳи меҳмонони бадахшонӣ дар шаҳрҳои Хуҷанд, Панҷакент, Истаравшан, ноҳияи Ҷаббор Расулов ва дигар навоҳӣ аз мавзеҳои таърихӣ ва дигар ҷойҳои зебои вилояти Суғд боздид ба амал меоранд.

Машҳур ИМОМНАЗАРОВ, “ҶТ”