Инсон аз ибтидо мекӯшад, то дар баҳри рангоранги ҳунар бошаду аз қаъри он дурдонаҳо ба даст орад. Ҷаҳд менамояд, то дар ҷодаҳои гуногуни ҳунар муваффақ бошаду бо василаи ҳунару санъате, ки дорад, ҳаёти хуберо барои хеш эҷод созад. Афзалшоҳ Сафарзода аз зумраи чунин ашхос аст. Ӯ санъаткорест, ки ғолиби чандин озмунҳои мусиқии дохилию ҷаҳонӣ, аз қабили “Во весь голос”, “International festival of languages”, “Орӯи тиллоӣ” ва озмуни ҷумҳуриявии “Тоҷикистон-Ватани азизи ман” гардидааст. Дар муаррифии фарҳангу маънавиёти миллати тоҷик то қадри имкон саҳм дорад ва аз зумраи ҷавононест, ки метавонад барои наврасону дигар ҷавонони кишвар намуна бошад. Мо барои огоҳӣ пайдо кардан аз паҳлуҳои зиндагии ин ҳунарманди ҷавон бо ӯ суҳбати ихтисосие анҷом додем, ки фишурдааш манзури хонанда мегардад.

- Чаро маҳз роҳи санъатро интихоб намудед?

- Ман, ки дар оилаи санъаткор ба дунё омадаам, аз хурдӣ ба мусиқӣ ва нозукиҳои он шавқ пайдо кардам. Бо маслиҳати падарам аз 7-солагӣ ба мактаб-интернати махсуси санъати ҷумҳуриявии ба номи Миратулло Атоев рафтам. Бо мурури замон дӯстдори мусиқӣ шудам. Фикр мекунам, ки ба санъат меҳр бастааму санъат низ ба ман қувва мебахшад, чун ҳаргиз дар ин роҳ хастагиро эҳсос накардам.

- Аввалин суруде, ки ба қавле ба шумо шуҳрат бахшид кадом аст?

- Аввалин маротиба дар озмуни “Орӯи тиллоӣ”, ки дар кишвари Белорусия миёни сарояндагони навраси 20 давлати дунё баргузор гардида буд, бо таронаи “Тоҷикистон” ҷойи аввалро гирифтам. Аз ин хеле хушнуд шудам. Эътиқодам нисбати ҳунар зиёд шуд. Фикр мекунам, ки ин озмун дар омӯзиш ва фаъолияти минбаъдаи ман нақши бузург бозид ва роҳи маро ба сӯйи саҳнаҳои бузург кушод.

- Шумо ба ҷуз ин ғолиби чандин озмунҳои дигар шудед, ба назаратон дар роҳи ҳунар чӣ тавр метавон муваффақ гардид?

- Ҳунарманд бояд пеш аз ҳама касби худро дӯст дорад, пайваста меҳнат кунад ва ба худ боварӣ дошта бошад.

- Шумо бо кӯмаки кӣ иштирокчии озмунҳои сатҳи ҷаҳонӣ шудед?

- Устодам Зафар Абдуалимов кӯшишҳои зиёди маро дида, маро дар ин озмунҳо номнавис мекарданд. Дар баробари ин таъкид менамуданд, ки бояд ғолиб шавам, то устодам дар интихоб хато накунанд. Бо ман бисёр машқ мекарданд. Заҳмату азхудгузаштанҳои устодам буд, ки дар озмуни “Во весь голос” (Русия), “International festival of languages” (Туркия) ҷойҳои якум ва медали тилло гирифтам.

Иштирок дар озмунҳо бароям боз як дарси иловагӣ шуд. Чун ҳакамон хатоҳо ва нозукиҳои мусиқиро ба мо мегуфтанд. Баъди озмунҳо кӯшиш мекардам, ки боз ҳам пешсаф шавам. Бо иштирок ва баромад дар озмунҳо ҷаҳониёнро шинохтам. Аз дигар фарҳангҳои дунё бохабар шудам. Ҳамин тариқ, дар озмунҳои гуногуни Белорусия, Руминия, Олмон, Белгия, Австралия, Африқо, Филиппин ва Амрико иштирок ва баромад намудам.

- Лаҳзаҳои фаромӯшнашаван-даи шумо кадом буд?

- 27 октябри соли 2015 дар ҷашни 3000-солагии Ҳисор, ки бо иштироки Пешвои муаззами миллат муҳтарам Эмомалӣ Раҳмон баргузор гардида буд, ҳаргиз аз ёдам намеравад. Чун ман дар ин ҷашн ҳам суруд хондам ва ҳам бо Сарвари давлат муҳтарам Эмомалӣ Раҳмон суҳбат намудам. Маро падарвор насиҳат намуда, масъулини соҳаи фарҳангро вазифадор намуданд, ки дастгириам кунанд. Баъди суҳбат бо Пешвои миллат хеле хушнуд шудам. Шояд ин суҳбат нақш дошт, ки ман дар ҷодаи санъат муваффақ шавам.

- Чун дар боло қайд намудед, ки ба бисёр давлатҳо сафар ва дар озмунҳо иштирок кардаед, пас бо чанд забони хориҷӣ ҳарф мезанед?

- Пас аз сароидани суруди “Немного жаль” дар озмуни “Во весь голос” дар худ мақсад гузоштам, ки дигар забонҳоро низ аз худ кунам. Дар аввал бароям ҳатто ба забони русӣ низ сароидани суруд мушкил буд, аммо кӯшишу заҳматҳои шабонарӯзиям буд, имрӯз бо забони тоҷикӣ, ӯзбекӣ, русӣ, англисӣ, озарбойҷонӣ, украинӣ ва ҳиндӣ суруд мехонам. Ҳунарманд бояд забонҳои хориҷиро аз худ кунад, то аз уҳдаи сароидани таронаҳо ба дигар забонҳо ба осонӣ барояд.

- Айни ҳол ба чӣ кор машғулед ва чӣ нақша доред?

- Кӯшиш мекунам, ки ҳама вақт бо нақша кор кунам. Имрӯз аз ҳамаи ин дастовардҳое, ки ноил шудаам, қаноатманд нестам, зеро ҳоло ҷавонам ва бояд талошҳои зиёдтар кунам. Дар баробари таҳсил дар Туркия ба омӯзиши забони чинӣ машғулам. Умед дорам, дар кӯтоҳтарин фурсат суруди навамро ба забони чинӣ пешкаши мухлисон намоям. Мехоҳам ҳунари худро сайқал дода, номбардори давлат ва парчами кишвари азизам бошам.