Чанде пеш, дар Донишгоҳи славянии Русияву Тоҷикистон (ДСРТ) бахшида ба ҳафтаи забони тоҷикӣ 400-солагии Сайидои Насафӣ ва 140-солагии устод Садриддин Айнӣ чорабинии фарҳангӣ доир гардид.

Нуралӣ Солеҳов, ректори донишгоҳ, зимни ифтитоҳи чорабинӣ меҳмононро ба ҳафтаи забони тоҷикӣ табрик намуда, қайд намуданд, ки “дар даврони Шӯравӣ сокинони кишвар ба забони русӣ ҳарф мезаданд ва забони тоҷикӣ дар аксар минтақаҳо қариб фаромуш гашта буд. Дар замони соҳибистиқлолӣ бо шарофати Пешвои миллат, муҳтарам Эмомалӣ Раҳмон забони тоҷикӣ дар минбарҳои бонуфузи ҷаҳон садо медиҳад, ки он аз таърихи куҳан доштани забони миллиамон дарак медиҳад”.

Зимни чорабинӣ ҳамчунин Хайрулло Табаров, мудири кафедраи забони тоҷикӣ ибрози назар намуда, таъкид сохт, ки “таҳия намудани чунин чорабиниҳо имкони хуби муаррифии забони ноби тоҷикӣ дар байни донишҷуёни донишгоҳ, ки аксари онҳоро хориҷиён ташкил медиҳанд, метавон фоли нек номид. Айни замон дар кафедра маҳфили “Сеҳри сухан” баҳри навқаламон амал мекунад, ки дар он донишҷӯёни фаъолро фаро гирифтаем”.

Дар чорабинӣ аъзоёни маҳфили мазкур аз эъҷодиёти устод С.Айнӣ ва Сайидои Насафӣ дар васфи забон шеърҳо қироат намуда, сипас порчае аз достони “Лайли ва Маҷнун”-и Низоми Ганҷавиро пешниҳоди ҳозирин сохтанд.

Дар фарҷом баҳри болидахотирии аҳли нишаст аз ҷониби аъзоёни маҳфили “Сеҳри сухан” барномаи фарҳангии саршор аз суруду таронаҳои ватандӯстона ва бозиҳои шавқовар намоиш дода шуд.