ФАРҲАНГ
Якшанбе 23 Феврал 2020 08:42
6701
Чоршанбе Аловатов, овозхони ҷавон дар мавсими аввали озмуни Central Asia’s Got Talent ғолиб омад ва соҳиби 26 ҳазор доллари амрикоӣ гардид.

Ӯ дар даври ниҳоӣ таронаеро аввал ба забони итолиёвӣ ва сипас ба тоҷикӣ иҷро намуд. Дар даврҳои гузашта таронаи “Агар он турки шерозӣ”-и Далер Назаров ва “Акрамҷон”-и Муборакшоро хонда, баҳои баланди доварон ва тамошобинонро ба даст оварда буд. Дар даври якум ӯ аллакай соҳиби тугмачаи тиллоӣ (золотая кнопка) гардида буд. Тибқи қоидаҳои озмун нафаре, ки соҳиби тугмачаи тиллоӣ мегардид, якбора ба даври ниманиҳоӣ роҳ меёфт. Чоршанбе Аловатов бо ба даст овардани тугмачаи тиллоӣ ба даври ниманиҳоии озмун роҳхат ёфта буд.

Ба даври ниҳоӣ 12 нафар иштирокдорон роҳхат гирифтанд. Маросими ҷоизасупорӣ рӯзи 22 юми декабр дар шаҳри Нурсултони Қазоқистон баргузор гардид.

Санаи 23 декабр соати 14:00 Чоршанбе Аловатов ба Душанбе расид. Ӯро намояндагон аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Вазорати фарҳанг, дигар сохторҳо ва мардуми зиёд бо гулу гулдаста пешвоз гирифтанд.
Чоршанбе Аловатов бо самимияти бевосита ба мардуми Тоҷикистон изҳори сипос кард, ки ӯро то охир дастгирӣ карданд: “Ташаккури зиёд ба ҳамаи шумо, ки ба ман овоз додед. Ин натанҳо ғолибияти ман, балки ғолибияти тамоми мардуми тоҷик аст. Ман аз падарам миннатдор ҳастам, ки ба ман нозукиҳои санъатро омӯзониданд. Ин озмун ба ман шӯҳрат дод. Муҳим аз ҳама халқ бовар кард, ки ман сазовори ин ҷоиза ҳастам. Дар оянда навигариҳои бештаре дар пеш аст. Тоҷикистон ба пеш!” - иброз намуд сароянда.

Назарзода Ризо, муовини аввали раиси Кумитаи кор бо ҷавонон ва варзиш, ки ба пешвози Чоршанбе Аловатов омада буд, ғолибияти ӯро ифтихори тамоми миллати тоҷик хонд: “Ман ифтихорманд аз онам, ки байни 70 миллион аҳолӣ, 4 давлати дунё маҳз фарҳанги миллии давлати тоҷик ва фарзанди ҳамин миллат беҳтарин эълон шуд. Ҳамзамон пагоҳ дастаи рақсии “Падида” низ ки байни дастаҳои рақсӣ беҳтарин ҳисобида шудаанд, меоянд. Ман тамоми миллати тоҷикро табрик мекунам,”- гуфт Назарзода Р.

Аловуддин Абдуллоев, ҳунарманди тоҷик, ки аъзои ҳакамон аз ҷониби Тоҷикистон буд, мегӯяд, ғолибияти Чоршанбе Аловатов муттаҳидиву ягонагии халқи тоҷикро бори дигар исбот кард:

- Ман қадрдониву муҳаббати тоҷиконаро дидам ва хеле шод шудам. Аз ҳамон рӯзи аввали баромади Чоршанбе муттаҳидиву ягонагии миллати мо маълум шуда буд,- қайд намуд А. Абдуллоев.
Аловуддин Абдуллоев мегӯяд, ҳамаи ин аз муҳаббат, истеъдод ва шукргузорӣ аз фазои осоиштаи ватанамон, ки чунин ҷавонони боистеъдод тавлид меёбанд, маншаъ мегирад: “Ифтихор дораму гиристам”,-илова кард ӯ.

Чоршанбе 22-сола ва писари Ақназар Аловатов, овозхони тоҷик аст. Ӯ инчунин иштирокчии озмунҳои “Овози тиллоӣ” ва “Парвин” дар Тоҷикистон буд.

Ғолибияти ӯ дар Central Asia’s Got Talent дар натиҷаи овоздиҳии сокинони минтақаҳои Осиёи Марказӣ ба даст омад. Чоршанбе Аловатовро тамоми мардуми Тоҷикистон аз аввал то даври ниҳоии озмун дастгирӣ намуданд. Дар шабакаҳои иҷтимоӣ низ мардуми Тоҷикистон аз пирӯзии ӯ шод шуда, ба истеъдоди худододаш аҳсан гуфтанд.

Музаффар Имомдод истифодабарндаи шабакаи иҷтимоии Фейсбук дар сахифааш навиштааст: “Пирӯзии Чоршанбе Аловатов якбори дигар барои ҳамаи мо нишон дод, ки мо ҳама аз як тан ва як гиребон сар мебарорем, ин орзуи ман буд”.

Озмуни байналмилалии Central Asia’s Got Talent дар даҳҳо кишвари дунё баргузор шудааст. Имсол ин озмун дар Тоҷикистону Қирғизистон ва Ӯзбекистону Қазоқистон баргузор шуд. Дар ин озмун аз чаҳор кишвар довталабони зиёде иштирок карда, ҳунару маҳорати худро ба намоиш гузоштанд. Аз Тоҷикистон дар ин озмун афроди алоҳида ва инчунин гуруҳи рақсии “Падида” иштирок карданд.

Ёдовар мешавем, ки рассоми рӯзномаи “ҶТ” низ иштирокчии озмуни мазкур буд ва ӯ то даври дуюм расида буд.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
27 28 29 30 31 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 1

Феврал 2020 c.