Дар 12-умин ҷашнвораи байналмилалии “Само” миёни филмҳои пешниҳодшудаи коргардонҳои тоҷик филмҳои “Бачаи обӣ” ва “Нолаи танбӯр”-и Файзулло Файзов ва Аниса Собирӣ дар бахши филмҳои байналмилалӣ сазовори ҷоиза гардиданд.

12-умин синамоҷашнвораи байналмилалии “Само” аз 26 то 28 ноябри соли ҷорӣ дар пойтахти Шветсия, шаҳри Стокголм баргузор шуда, он аз ду бахш - филмҳои миллӣ ва байналмилалӣ иборат буд.          

Филми “Бачаи обӣ”-и коргардони тоҷик Файзулло Файзов, ки дар жанри драмаи иҷтимоӣ рӯи навор омадааст, сабки хоси худро дошта, он аз ҷониби доварон баҳои баланд гирифт ва сазовори ҷоиза гардид.

Дар филми “Нолаи танбур”-и коргардон Аниса Собирӣ тасвири ҷанг ва таъсири он ба ҳаёти инсонҳо пурра инъикос гардида, он низ аз ҷониби ҳакамон баҳои баланд гирифт.