Бахшида ба Рӯзи Рӯдакӣ дар назди бинои Донишгоҳи давлатии Кӯлоб ба номи А.Рӯдакӣ муҷассамаи сардафтари адабиёти форсу тоҷик Абӯабдуллоҳи Рӯдакӣ қомат афрохт.

Дар маросими муаррифии муҷассама Хайруллоҳ Амонуллоҳ, раиси шаҳри Кӯлоб, , шоирону нависандагон ва донишҷӯён ширкат намуданд.

Абдулло Ҳабибулло, ректори Донишгоҳи давлатии Кӯлоб номи А.Рӯдакӣ зимни суханронии хеш иброз дошт, ки “баъди сохтмони бинои нави ҳафтошёнаи донишгоҳи мазкур ҳайкали устод Рӯдакӣ баъди навсозӣ дубора дар назди донишгоҳ қомат афрохт. Қомат афрохтани муҷассамаи устод Рӯдакӣ дар назди донишгоҳи мо шаҳомати ин даргоҳро афзуда, он ҳидоятест ба донишҷӯёну сокинони шаҳр, ки мисли устод Рӯдакӣ ҳамеша тараннумгари андешаҳои инсонпарварона ва номбардори миллат бошанд”.

Дар фарҷоми чорабинӣ ба як қатор фаъолони донишгоҳ, ки дар баланд бардоштани таълиму тарбия саҳм гузоштаанд, ифтихорномаву сипосномаҳо тақдим гардид.