Дар даромадгоҳи шарқии шаҳри Панҷакент боғи фарҳангию фароғатӣ бо муҷассамаи муаллифи “Шоҳнома”-и безавол Абулқосим Фирдавсӣ бунёд мешавад. Дар ин хусус аз Мақомоти иҷроияи маҳаллии ҳокимияти давлатии шаҳри Панҷакент хабар медиҳанд.

Тибқи маълумот, боғи фарҳангию фароғатии Абулқосим Фирдавсӣ дар буриши хиёбони Абуабдуллоҳи Рӯдакӣ ва кӯчаи Саъдии Шерозӣ дар масоҳати 7600 метри мураббаъ бунёд шуда, тарҳи он ба сози мусиқии тор шабоҳат дорад. Дар ин раванд, дар пешгоҳи майдони асосии боғ муҷассамаи Абулқосим Фирдавсӣ бо зерпояаш бо баландии 11,7 метр қомат афрохта, дар пасманзар ва паҳлуҳои он деворнигораҳо бо муҳтавои достонҳои безаволи “Шоҳнома” - разми Рустам бо Суҳроб ва муҷассамаи ду аспи саманд пешбинӣ шудааст.

Боғи мазкур бо ҷонибдорӣ аз иқдомҳои бунёдкоронаи Пешвои муаззами миллат муҳтарам Эмомалӣ Раҳмон бунёд гардида, дар назар аст, ки дар арафаи таҷлили 35-солагии Истиқлоли давлатии Ҷумҳурии Тоҷикистон ифтитоҳ гардад.

Ҷасури ҚИЁМИДДИН, “ҶТ”