Аз 27 то 31-уми январи соли равон дар шаҳри Мумбайи Ҷумҳурии Ҳиндустон синамоҷашнвораи байналмилалии кишварҳои аъзои Созмони Ҳамкории Шанхай баргузор мегардад. Дар ин бора Муассисаи давлатии “Тоҷикфилм” иттилоъ дод.

Бино ба иттилои манбаъ дар чорабинии сатҳи байналмилалӣ ба ҳайси довар ва намоянда аз Тоҷикистон директори Муассисаи давлатии “Тоҷикфилм” Маҳмадсаид Шоҳиён иштирок намуда, Ҷумҳурии Тоҷикистонро муаррифӣ менамояд.

Ҳамчунин, дар бахши озмунии синамоҷашнвора якчанд филмҳои ҳунарӣ аз кишвар - “Дов” - и коргардон Муҳиддин Музаффар, “Охирин сайди сайёд” - и коргардон Муҳаммадрабӣ Исмоил ва “Роҳ” - и коргардон Носир Саидов пешниҳод мегардад. Ҳамчунин дар бахши ғайриозмунии синамоҷашнвора филми кӯтоҳи ҳунарии “Этюд” - и коргардон Мумин Қодиров намоиш дода мешавад.

Гуфта мешавад, дар бахши озмунии синамоҷашнвора филмҳо аз ҳашт кишвари аъзо пешниҳод гардида, миёни ҳам рақобат менамоянд ва дар бахши ғайриозмунӣ филмҳо барои алоқамандони синамо намоиш дода мешаванд.

Таҳмина ЮСУФӢ, “ҶТ”