Роҳи тайкардаи Нилуфари Самандар чандон тӯлонӣ нест, вале аз фарози он ба поён нигоҳ карда, ифтихор менамояд, ки ба ҳар коре оғоз намудааст, ба саъю талоши худ ва мусоидати волидони меҳрубону устодони ғамхор сазовор гардидааст. Хушбахтона, бо шарофати сиёсати пешгирифтаи Пешвои миллат, муҳтарам Эмомалӣ Раҳмон мавқеи гулдухтарони тоҷик дар Тоҷикистони азизи мо баланд буда, ӯ ҷидду ҷаҳд дорад, ки мақоми ҷавондухтарони пешқадамро дар ҷомеа боз ҳам баланд бардошта, саҳми онҳоро дар рушду нумуи мамлакат ҷовидона гардонад.

Боиси ифтихор аст, ки дигар халқияту миллатҳо духтарону бонувони тоҷикро аз пешқадамтарин занони олам аз лиҳози ҳусн, одоб, маданияти баланд арзёбӣ намуда, онҳоро ҳамчун ашхоси созандаю ободкор мешиносанд. Зеро ҳамеша зебоӣ ва назокати зани тоҷик дар китобҳои машҳури шоирону нависандагон бо некӣ ёд мешавад. Нилуфари Самандар низ аз зумраи он гулдухтаронест, ки бо ҳусни табииву истеъдоди худодод маҳбуби ҳамагон гаштааст.

Нилуфар - ин чевардухтари гулчеҳра 30 майи соли 1992 дар деҳаи Даҳанаи дараи зебоманзари Варзоб ба дунё омадааст. Ин диёри афсонавӣ бо замини пурсаховат, кӯҳҳои сабзпӯш, чашмасорони зулол, боғу дарахтони пурмевааш дар қалби поки ӯ ҳавасдонаҳои ҳунару зебопарастиро ҷой додааст. Давраи наврасии ӯ ин ҷо сипарӣ шуду бо ҳамсабақон айёми донишомӯзӣ ҳам. Ин духтараки ситорагарм ҳанӯз аз овони наврасӣ ҷасоратманду пешқадам буду ватандӯст, ки ин сифатҳои нек то имрӯз дар замири ӯ боқӣ мондааст.

Нилуфари хурдсол дар назди модари меҳрубонаш нишаста, ба лавозимоти дӯхташудаи хона таваҷҷуҳ зоҳир мекард. Модари мулоҳизакор шавқу завқи духтарашро ҳис намуда, ба ӯ гулдӯзиро меомӯхт ва ба санъати кораш баҳо медод. Нилуфар аз тарзи нави дарздӯзӣ, аз таассуроти хеш ба апаҳояш қиссаҳо мекард ва барояшон бо нишондоди модар пироҳанҳо медӯхт.

- Модарам бонуи хунарманд буд, моро аз хурдӣ ба корҳои самарабахш сафарбар менамуд ва таъкид мекард, ки вақтро сарфакорона истифода намоем. Мо дар оила се нафар хоҳарон будем, ки ҳамеша тибқи муқаррароти модар амал менамудем, -мегӯяд Нилуфар.

Нилуфари ҷавон соли 2015 ҳамроҳи 7 нафар чевардухтарони пешқадам дар номинатсияи фестивал - озмуни ҷумҳуриявии “Дастони моҳир”, ки дар Телевизиони “Сафина” намоиш дода шуд, ширкат намуда, сазовори ҷои намоён гардид. Ҳама ба ҳунари дӯзандагии ӯ баҳои баланд дода, барору комёбиҳои нав ба нави меҳнатӣ орзу намуданд.

Нилуфар ҷонибдори маълумотнок ва ҳунарманд будани духтарони тоҷик аст. Ӯ итминони комил дорад, ки саводу ҳунар метавонад оилаҳоро аз камбизоатӣ раҳо намояд. Ӯ ҳамеша саъю талош менамояд, ки дар ҳама кору вазифа донишашро такмилу сайқал диҳад. Нилуфари ҷавон бо мақсади ҳунарманд шудану касб омӯхтан 16 феврали соли 2017 бо 18 нафар гулдухтари тоҷик дар Муассисаи давлатии “Маркази таълими калонсолони Тоҷикистон” таҳсил намуда, соҳиби шаҳодатномаи дӯзандагӣ гардид. Ҳамзамон, 20 майи соли 2017 бахшида ба Рӯзи ҷавонон бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон фестивал-озмуни тарроҳони ҷавон баргузор гардид. Нилуфари чирадаст яке аз дӯзандагони пешқадам, иштирокчии фаъоли ин фестивал-озмун буд ва ҳамчун ғолиби мусобиқа сазовори диплом, зиреҳи нуқрагину қайчии хурдакаки дар он овезон шуд.

Нилуфар баъдан бо ҳидоят ва дастгирии падар корхонаи дӯзандагӣ таъсис дод. Ӯ дар навбати аввал 7 нафар духтарони бекори гирду атрофро даъват намуда, ба касби дӯзандагӣ сафарбар намуд. Сипас сафи онҳо афзуд ва духтарон бо сарварии ӯ дар маҳаллаи Майдони сарҳадчиёни шаҳри Душанбе ба дӯхтани либосҳои мардонаю занона бо нархҳои арзону дастрас оғоз намуданд. Ҳамчунин дар баробари либосу пардадӯзӣ ва кӯрпадӯзӣ кӯшиш ба харҷ дода шуд, ки ҳунари чакандӯзиро низ аз худ намоянд. Гулдухтарони дӯзанда ҳамеша дар андешаи ворид намудани тарзҳои наву ҷолиб дар духтудӯз, хосса чакан, мебошанд. Дӯкони дӯзандагии онҳо бо услуби тоҷикона зебу зинат ёфтааст ва дар он духтарон бо дӯхтани лавозимоти гуногун машғуланду дастранҷи онҳо чашмро мерабояд. Гӯшаи ҳунарҳои мардумии корхонаи дӯзандагӣ зебою диққатҷалбкунанда ҷиҳозонида шудааст ва ин намунаи ибрат барои ҳамагон мебошад.

Нилуфари Самандар аз дастовардҳои давлату Ҳукумати Тоҷикистон изҳори қаноатмандӣ намуда, мегӯяд: “Корнамоиҳои миллати тоҷик бо сарварии Пешвои миллат муҳтарам Эмомалӣ Раҳмон дар таърихи давлатдории тоҷикон бесобиқа аст. Мо, ҷавонон, дӯст доштани миллату давлат ва Ватани хеш, арҷ гузоштан ва ҳифз намудани муқаддасоти онро аз сарвари хирадмандамон омӯхтаем”.

Воқеан, “Солҳои рушди деҳот, сайёҳӣ ва ҳунарҳои мардумӣ” эълон гардидани солҳои 2019-2021 аз беҳтарин ва манфиатноктарин ташаббусҳои Пешвои миллат муҳтарам Эмомалӣ Раҳмон мебошад. Нилуфар чун як фарди ватандӯст тамоми кӯшишу ғайрат ва талоши худро баҳри амалӣ намудани ташаббусҳои наҷиби Президенти мамлакат равона кардааст.

Бо ифтихор гуфтан мумкин аст, ки Нилуфари Самандар тамоми саъю кӯшиши худро баҳри хизмат ба мардум, некӯаҳволӣ ва зиндагии осоиштаи халқи азизи хеш равона месозад. Ӯ даҳҳо шогирдонро тарбия намуда, ба роҳи рости зиндагие, ки худаш бо ҳидояти падару модар интихоб намудааст, аз ҷумла ватандӯстӣ, ободкорӣ, дастгирии эҳтиёҷмандон, дӯст доштани сарзамини аҷдодӣ роҳнамоӣ мекунад.

Имрӯз дар корхона тамоми ҷидду ҷаҳди духтарони дӯзанда ба он равона гардидааст, ки бо сарварии Нилуфари Самандар тамоми нақшаю чорабиниҳои дар наздашон бударо бо сарбаландӣ анҷом дода, ҷашни 30-солагии Истиқлолияти давлатии Ҷумҳурии Тоҷикистонро сазовор пешвоз гиранд.

Ҳоким КАРИМОВ,

узви ИЖТ