ФАРҲАНГ
Сешанбе 02 Март 2021 09:34
7804
Дар гузашта санъати мусиқии тоҷик аз бузургтарин санъатҳо ба ҳисоб мерафт. Ромишгарону ҳунармандони мумтози мо баҳри густариши ҳунари волои тоҷикона талошҳои чашмрасе доштанд. Ин гуфтаҳоро саҳфаҳои таърих исбот мекунанд.

Хушбахтона, бо гузашти айём маҳбубияти санъати асил ва фарҳанги қадимаи тоҷик миёни мардум кам нагардидааст. Имрӯз санъати мусиқии тоҷик дар ҳоли рушд қарор дошта, на танҳо дар кишвар, балки берун аз марз низ маҳбубияти хоссаро касб намудааст. Тарона ва навозишҳои ҷовидонаи ин миллат дар хориҷ садо медиҳанд, ки гувоҳи санъати асил ва бузургии миллат мебошад. Фарзандони барӯманди диёр берун аз Ватан ансамблҳои ҳунарию мусиқӣ таъсис дода, ба ин васила мероси ниёгони мусиқии тоҷикро дар минтақа ва ҷаҳон муаррифӣ месозанд. Ансамбли тарона ва рақси “Насими Ватан” тақвияти ин гуфтаҳо мебошад.

Ин ансамбл бо ибтикори Консулгарии генералии Ҷумҳурии Тоҷикистон дар якҷоягӣ бо ҳамватанони бурунмарзӣ дар шаҳри Алмаатои Ҷумҳурии Қазоқистон 2 сол қабл таъсис дода шудааст. Мавриди зикр аст, ки ансамбл нахустин ҳайати касбӣ дар соҳаи санъати сарояндагӣ, мусиқӣ ва рақсии тоҷикони Қазоқистон ба шумор меравад. Дар ин ансамбл 8 нафар ҳунармандони тоҷики муқими Қазоқистон, ки дорои истеъдоди касбӣ мебошанд, гирд омадаанд. Тарғиби санъати сарояндагию навозандагӣ ва рақсии миллати тоҷик ҳадафҳои асосии ансамбл ба шумор меравад. Ҳунармандони ансамбл дар барномаҳои консертӣ суруду тарона ва рақсҳои тоҷикиро бо мусиқии қазоқӣ омехта намуда, дар сатҳи баланди касбӣ иҷро мекунанд. Барои таъмин намудани фаъолияти мунтазами ансамбл раиси Шӯрои занони Ассамблеяи халқҳои вилояти Жамбули Ҷумҳурии Қазоқистон Гулхумор Давлатова саҳми назаррас дорад.

Чуноне ӯ мегӯяд: “Бо нияти нек ва ҳисси ватандӯстӣ маданият ва расму оинҳои миллати тоҷикро дар хориҷ аз кишвар баланд бардоштан, қарзи ҷонии ҳар як соҳибватан мебошад. Бо пешниҳоди Консулгарии генералии Тоҷикистон дар Қазоқистон аз ҳисоби Лола Давлатова, Хуршеди Ёрмаҳмад, Шарифҷон Назарзода ва дигар тоҷикони фаъоли вилояти Жамбул ин ансамблро таъсис додем”.

Ансамбли “Насими Ватан” дар чорабиниҳои фарҳангӣ - фароғатии Ҷумҳурии Қазоқистон бо барномаҳои консертӣ ширкат меварзанд. Аз ҷумла, санъаткорони ин ансамбл дар чорабиниҳои давлатӣ ва намояндагии дипломатии Тоҷикистон дар Ҷумҳурии Қазоқистон санъати миллии тоҷикро дар сатҳи хеле баланд намоиш медиҳанд. Инчунин, ансамбли “Насими Ватан” дар баргузории ҷашнҳои миллии Тоҷикистон дар қаламрави Қазоқистон фаъолона иштирок менамояд. Истеъдод, саҳм ва заҳмати ҳунармандони ансамбл ҳамеша мавриди таваҷҷуҳи Консулгарии генералии Ҷумҳурии Тоҷикистон дар Алмаато қарор дорад.

Консули генералии Тоҷикистон дар Алмаато Баҳодур Назир қайд менамояд, ки: “Ҷиҳати иҷрои вазифаҳои хеш пайваста ба минтақаҳои ҳавзаи консулӣ сафарҳои корӣ анҷом дода, бо мақсади шиносоӣ аз вазъи будубоши ҳамватанони бурунмарзӣ вохӯриҳо мегузаронем. Соли 2019 дар яке аз чунин сафарҳо дар шаҳри Тарази вилояти Жамбул ҳангоми вохӯрӣ таъсис додани як гурӯҳи ҳунарӣ бо мақсади муаррифии фарҳангу мусиқии тоҷик дар Қазоқистон пешниҳод гардид. Ин иқдом аз ҷониби иштирокчиён бо хушӣ пазируфта шуд. Ҳамин тавр, Ансамбли тарона ва рақси “Насими Ватан” бунёд гардид. Ансамбл аввалин маротиба дар ҷашни Ваҳдати миллӣ, ки 27 июни соли 2019 дар Консулгарии генералии Ҷумҳурии Тоҷикистон дар шаҳри Алмаатои Ҷумҳурии Қазоқистон таҷлил гардид, баромад намуд. Имрӯз ин ансамбл дар Ҷумҳурии Қазоқистон мақоми худро касб намудааст”.

Айни замон ин ансамбл байни дигар гурӯҳҳои эҷодӣ манзалати хоссаро соҳиб мебошад. Ансамбл аз соли таъсисёбӣ ҳунармандонро дар роҳи хештаншиносӣ тарбия намуда истодааст. Бо итминони комил метавон гуфт, ки дар оянда ин гурӯҳи эҷодӣ ҳамчун як мактаби ҳунарӣ дар тарғиби фарҳангу миллати тоҷик дар шарқ ва хориҷ аз кишвар саҳми босазо хоҳад гузошт. Дар замони бархӯрди тамаддунҳо чунин дигаргуниҳои ғайриинтизор метавонад ҳам мудофеъ ва ҳам муаррифгари миллат бошад.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31 1 2 3 4

Март 2021 c.