Аз 15 то 18-уми октябр дар шаҳри Душанбе дуюмин Синамоҷоизаи миллии “Тоҷи Сомон” баргузор мегардад. Ин ҷашнвора бахшида ба рӯзи кинои тоҷик зери унвони “Қадршиносии ҳунари асил” доир хоҳад шуд.

Тавре аз Муассисаи давлатии “Тоҷикфилм” иттилоъ медиҳанд, ҳадафи Синамоҷоиза пеш аз ҳама, дастгирии ҷавонони эҷодкор, таваҷҷуҳ ба арзишҳои миллӣ, тарбияи эҳсоси ватандӯстӣ, ифтихор аз миллати созанда, тавсифи табиати зебои Тоҷикистони муосир, ҷалби сайёҳон ва дарёфти истеъдодҳои нодир дар соҳаи синамо ба ҳисоб меравад.

Ҳамчунин гуфта мешавад, ки дар дуюмин Синамоҷоизаи миллии “Тоҷи Сомон” филмҳои пурра, кӯтоҳи бадеӣ, мустанад ва тасвирӣ, ки дар давоми солҳои 2023-2024 рӯйи навор омадаанд, метавонанд ширкат намоянд.

Беҳтарин филмҳоро ҳайати ҳакамони байналмилалӣ ва миллӣ аз қабили филмсозони арзанда ва мунаққидону пажӯҳишгарони ин соҳа муайян хоҳанд кард.

Сайёраи ҚИЁМИДДИН, “ҶТ”