Бо ҷалби зиёда аз 40 нафар ҷавондухтарони ҷамоатҳои ноҳияи Роштқалъа дар “Хонаи фарҳанг” - и ноҳия фестивал – озмуни “Чакомаи гесӯ” баргузор гардид.

Чорабинӣ бо ташаббуси Шуъбаи кор бо занон ва оилаи ноҳия дар ҳамкорӣ бо Бахши кор бо ҷавонон ва варзиш сурат гирифта, дар он ҷавондухтарон беҳтарин ҳунари машшотагӣ, мӯйбофию ороиши он, намоиши сарулибоси миллӣ, малакаи муоширату гуфтор ва ғайраро пешкаши ҳозирин намуданд.

Ҳамин тавр, аз рӯи натиҷаҳои умумӣ ҷамоати Қурбоншоҳ Гадолиев ҷойи аввалро ишғол намуда, ғолиби озмун гашт ва ба даври вилоятӣ роҳхат гирифт. Зинаҳои дуюму сеюм насиби ҷамоатҳои Роштқалъаю Мирсаид Миршакар гардиданд.

Мавриди зикр аст, ки ҳайати ҳакамон ба ҳамаи ҳунарҳои ҷавондухтарон баҳои баланд дода, онҳоро бо ифтихорномаю туҳфаҳои гуногун сарфароз карданд.