Аз 7 то 9 июли соли ҷорӣ дар ноҳияи Мурғоб таҳти унвони “Ҷоми латофат”фестивали байналмилалӣ баргузор мегардад, ки дар он 18 гуруҳи фарҳангӣ – намояндагони кишварҳои Осиёи Миёна, Русия, вилоятҳои Хатлону Суғд ва ҳамаи ноҳияҳои ВМКБ ширкат меварзанд.

Тавре ташкилкунандаи фестивали фарҳангӣ Баҳром Қодиров иттилоъ дод, чорабинӣ ба ифтихори Рӯзи Ваҳдати миллӣ ва “Соли ҷавонон” баргузор мешавад. Ташаббускори он ташкилоти ҷамъиятии “Ҷавонони Мурғоб” буда, дар ҳамкорӣ бо Бахши ҷавонон, варзиш ва сайёҳӣ ва мақомоти иҷроияи маҳаллии хокимияти давлатии ноҳияи Мурғоб роҳандозӣ мешавад.

“Ҷоми латофат” фестивали фарҳангиву фароғатӣ, анъанавию оммавӣ буда, дар варзишгоҳи ҷамоати “Мурғоб” гузаронда мешавад.
Ҳадаф аз баргузор намудани фестивал нигоҳ доштани урфу одат, анъана, санъати миллӣ, пос доштани суннатҳои волои аҷдодӣ, дарёфти ҳунармандони чирадаст аз миёни ҷавонону наврасон, замина гузоштан барои иттиҳоду дӯстии халқиятҳо ва ҳамзамон дидорбинӣ кардан аз манзараҳои дилфиреби табиати ноҳия мебошад,” – гуфт Б. Қодиров.

Машҳур ИМОМНАЗАРОВ, ҶТ