Бо ташаббуси Бахши фарҳанги ноҳияи Мурғоб дар ҳамкорӣ бо ширкатҳои “Pamir Energy”, “Динар сервис”, “Хушкор” ва иттиҳодияи ҷавонони “Мурғоб”-и шаҳри Маскави Русия дар ноҳияи Мурғоб фестивали фарҳангӣ–фароғатии Ҷоми “Латофат–2017” баргузор гардид.

Дар чорабинӣ Гулзор Бозоров, ҳунарманди шоистаи ноҳияи Ишкошим таҳти роҳбарии гурӯҳи ҳунарии ноҳия, Рустам Қаниев, санъаткори шинохтаи ноҳияи Мурғоб (Аълочии фарҳанги Ҷумҳурии Тоҷикистон) бо гурӯҳи ҳунарии “Мурғоб”, Ансамблҳои раққосии тоҷикдухтарони “Сомонӣ–2” , рақси миллии қирғизии “Қара–Ҷорғо” ва дигар ҳунармандон ширкат варзида, санъату маҳорати волои хешро баҳри иштирокдорон пешкаш намуданд.

Ба итиллои Баҳром Қодиров, ташкилкунандаи фестивал мафҳуми Ҷоми “Латофат–2017” ба даст овардани ҷоми вижае набуда, балки муттаҳид намудани иштирокдорон гирди як чорбинии сатҳи байналмилалӣ, лутф, дӯстиву рафоқат нисбати ҳамдигар аст: “Ҳадаф аз баргузории он эҳё намудани санъату фарҳанги волои аҷдодӣ, дидорбинӣ аз манзараҳои нотакрори ноҳия ва дарёфти ҳунармандони чирадасту бомаҳорат мебошад. Ният дорем, ки ин иқдомро ба ҳукми анъана дароварда, ҳамасола ҳофизону ҳунармандон, шарикони муносиб, соҳибкорони бештарро ба он ҷалб созем”.

Дар Фестивал ҳунармандон, мутрибону навозандагони “Навои Вахон”, санъаткорони Мурғоб ва дигарон созу наво, санъати рақс, сурудҳои халқӣ аз қабили “Фалаки Даштӣ”, “Булбулик”–ро пешкаши ҳозирин намуда, аз ҷониби доварон баҳои баланд гирифтанд.

Ҳамчунин иштирокдорон аз мавзеҳои хушманзара ва тамошобоби ноҳия дидан намуданд.

Гулзор Бозоров, роҳбари гурӯҳи ҳунарии мазкур гуфт, ки аз омадан ба ин макони дилписанд воқеан дар ҳайрат аст: “Баъзеи мо бори аввал ба ноҳияи Мурғоб омада, аз меҳмоннавозии самимии бошандагон хело ҳам дилгарм шудем. Миннатдории хешро ба ҳамаи ташкилкунандагони маърака изҳор намуда, аз забони шоир Мирзо Турсунзода мегӯям:

Дӯст ояд, гарм дар оғӯш гир,

Расми хуби тоҷиконро гум макун!”

Машҳур ИМОМНАЗАРОВ, “ҶТ”