Дар арафаи Рӯзи матбуот ва ба хотири 75-солагии мелоди собиқадори матбуоти кишвар, Гулчеҳра Фозилова маҷмуаи “Гули матбуот” аз чоп баромад.

Китоб бо ибтикори рӯзномаи “Ҷавонони Тоҷикистон” баҳри қадрдонӣ ва подоши заҳматҳои зиёда аз 50 - солаи Гулчеҳра Фозилова дар матбуоти кишвар махсусан дар рӯзномаи “Ҷавонони Тоҷикистон” рӯи чоп омада, фарогири мақолаву ёддошт ва лавҳаву мусоҳибаҳое мебошад, ки дар давраҳои гуногун оиди фаъолияту зиндагии марҳум Фозилова навишта шудаанд.

Баробари ёддошти ҳамкорону ҳамкасбон, инчунин дар маҷмуа шеърҳо дар васфи Гулчеҳра Фозилова ҷой доранд, ки бузургиву ҳашамати ин зани корозмӯдаро инъикос мекунанд. Дар идома расмҳои гӯё аз тамоми давраи фаъолияти Фозилова китобро зиннат дода, хонандаро ба ҳаёти воқеии он ошно месозад.