Театри давлатии драмаи мусиқии ба номи Тӯҳфа Фозиловаи шаҳри Конибодом дар арафаи рӯзи театри тоҷик, ки ҳамасола 7 ноябр ҷашн гирифта мешавад, иқдомҳои зиёдеро рӯи даст гирифтааст.

Бино ба иттилло бахшида ба рӯзи театри тоҷик санаи 7 ноябр дар ютуб канали театри Конибодом нахустнамоиши филми мустанади таърихӣ бо номи “Шаҳре дар театр” пешкаши мухлисони театри мазкур мешавад ва ба гуфти таҳиягарони филми мазкур то ҳол кам ва шояд театрҳои кишвар чунин филмҳои таърихӣ аз рӯзи таъсиси театрашон надошта бошанд.

Дар баробари ин ҳунармандони ҷавони театр намоишҳояшонро аз таҳлили коршиносони машҳури дунё мегузаронанд.

Ҳамзамон иқдоми дигаре, ки театри мазкур амалӣ намуд, ин ташкили озмуни қиссанависони наврас бо номи “Қиссаи ҷолиби ман” буд, ки чанд рӯз пеш ҷамъбаст ва ғолибонаш қадрдонӣ гардиданд.

Гуфта мешавад, дар озмуни мазкур аз 50 қиссаи ирсолнамудаи иштирокчиёни озмун ҳайати доварон се қиссаи марғубро шоистаи ғолибият донистанд ва муаллифони онро бо туҳфаҳои хотиравӣ қадрдонӣ намуданд.
Бояд гуфт, ки Театри давлатии драмаи мусиқии ба номи Тӯҳфа Фозиловаи шаҳри Конибодом дар давраи пандемия бекор наистода, онҳо дар ин давра барои аз даст надодани мухлисони театр намоишномаҳои аудиоиро бо номи “Одатҳои шаҳрӣ” аз рӯи асари Ҷумъа Қудус сабт намуда, тариқи радиои маҳаллӣ ба сокинон шунавониданд ва дар ютуб канали театр нашр карданд.

Барои тамошобинони хурдсол бошад, лоиҳаи “Афсонаҳои гирди сандалӣ”-ро амалӣ кардаанд. Ҳунармандон афсонаҳояшонро нақл карда, ба шакли видеоӣ ба намоиш мегузоранд.