Аз 23 октябр то 12 ноябри соли равон дар шаҳрҳои Курган, Тюмен ва Ярослави Федератсияи Россия Фестивали байналмилалии театрҳои русӣ баргузор мегардад.

Дар фестивали мазкур дастаи ҳунарии театри давлатии драмавии русии ба номи Владимир Маяковскийи шаҳри Душанбе бо намоишномаҳои “Тартюф”-и Жан Батист Мольер ва “Ночь в театре”-и Антон Чехов иштирок менамояд.

Дар ин бора директори театри мазкур Мунира Дадаева иттилоъ дод. Тавре ӯ гуфт ҳамасола дар доираи барномаи “Большие гастрол” (Саёҳати бузург) ҳунармандони театри Маяковский дар фестивали зикргардида иштирок намуда, бо ҳунару маҳорати фавқулодаи хеш тамошобинонро ба ҳайрат мегузоранд. Соли ҷорӣ низ умедворем, ки намоишномаҳои омоданамудаамон табъи тамошобинонро болида месозад.