Имрӯз, 31 январ ба ифтихори ҷашни Сада дар майдони Исмоили Сомонии шаҳри Хоруғ бо иштироки раиси ВМКБ Ёдгор Файзов, раиси шаҳр Кишвар Шамирӣ ва сонинони вилоят чорабинии идона баргузор гардид.

Нахуст Ё. Файзов ҳозиринро ба муносибати ид табрик намуда, дар симои сокинони вилоят ҳамаи тоҷикони дунёро самимона шодбош гуфт.

Зикр гардид, ки чунин ҷашни муқаддасу бостонӣ миллатҳоро ба ҳам оварда, дар гиромидошти ойини ниёгон нақши муассир дорад.Сада яке аз ҷашнҳои мавсимию маросимии мардуми ориёитабор буда, ба мардум муждаи нахусти баҳор меораду деҳқононро барои кишту кори саҳро омода мекунад.

Дар чорабинӣ бонувони вилоят, ҳунармандон, кишоварзони деҳот ва фаъолони соҳаҳои гуногуни вилоят дастовардҳои хешро ба намоиш гузошта, ба сокинону меҳмонон анвои маҳсулоти ғизоӣ пешкаш намуданд.

Сипас дар барномаи омоданамудаи аҳли фарҳанги вилоят ҳофизони беҳтарин таронаҳои дилошӯбро сароида, табъи ишитрокдоронро болида гардонданд.