12 январ дар толори Коллеҷи ҷумҳуриявии рассомии ба номи Мирзораҳмат Олимов, озмуни истеъдодҳои навраси мактабҳои рассомии бачагона ва муассисаҳои таълимии Вазорати фарҳанги Ҷумҳурии Тоҷикистон - фестивати ҷумҳуриявии “Рассомони наврас” ҷамъбаст гардид.

Тавре аз дафтари матбуотии Вазорати фарҳанг маълумот доданд, фестивали мазкур аз ҷониби Вазорати фарҳанг бо мақсади ҳавасмандгардонӣ, тарғиби навҷӯию эҷодкорӣ ва дастгирии истеъдодҳои наврасон дар соҳаи санъати тасвирӣ, инкишоф додани малакаҳои касбӣ ва ҳунарии онҳо, инчунин омода намудани истеъдодҳои ҷавон ба озмуну фестивалҳои байналмилалӣ баргузор гардид.

Дар озмун муовини якуми вазири фарҳанги Ҷумҳурии Тоҷикистон Обид Назариён, сардори шуъбаи илм ва муассисаҳои таълимии вазорати фарҳанг Музаффар Темурзода, директори Коллеҷи ҷумҳуриявии рассомӣ Сироҷиддин Ҷӯрахонов ва рассомони наврас иштирок доштанд.

Гуфта мешавад, ки дар озмун маҳсули эҷодии рассомони навраси мактабҳои бачагонаи рассомӣ ва муассисаҳои таълимии вазорати фарҳанг, мактаби бачагонаи санъати ба номи М. Аминзода, мактаб-интернати миёнаи махсуси санъати ба номи Миратулло Атоев, мактаби рассомии Раёсати фарҳанги шаҳри Душанбе, коллеҷи ҷумҳуриявии рассомии ба номи Мирзораҳмат Олимов, маркази бачагонаи рассомии Донишкадаи давлатии санъати тасвирӣ ва дизайни Тоҷикистон, мактаби бачагонаи рассомии шаҳри Ваҳдат, мактаби бачагонаи рассомии шаҳри Ҳисор ва мактаби бачагонаи санъати ноҳияи Варзоб ба намоиш гузошта шудаанд.

Дар анҷоми фестивал, 31 нафар ғолибон бо диплому туҳфаҳо ва мукофотҳои пулии кумитаи тадорукот қадрдонӣ гардиданд.