Дар вилояти Хатлон шуруъ аз 16 июл чорабиниҳои фарҳангӣ-фароғатӣ оғоз гардиданд, ки он то 6-уми сентябри соли ҷорӣ ҳамарӯза ба роҳ монда мешавад.

Дар ин бора Хадамоти матбуоти раиси вилояти Хатлон хабар медиҳад.

Манбаъ хабар медиҳад, ки чорабиниҳои фарҳангӣ-фароғатӣ дар назди Театри вилоятии мусиқӣ-мазҳакавӣ ба номи Ато Муҳаммадҷонов ва Нишони давлатии Ҷумҳурии Тоҷикистон дар шаҳри Бохтар аз ҷониби ташкилоту муассисаҳои вилоятӣ доир мешаванд.

Гуфта мешавад, вақти чорабиниҳои фарҳангӣ аз соати 19:00 то соати 21:00 муқаррар гардидааст. Сокинон метавонанд ҳамарӯза дар ин чорабиниҳо иштирок намоянд.

Бояд гуфт, ки чорабиниҳои мазкур ҷиҳати дар сатҳи баланди ташкилӣ ва фарҳангӣ доир намудани ҷашни Истиқлоли давлатии Ҷумҳурии Тоҷикистон бо ташаббуси Мақомоти иҷроияи ҳокимияти давлатии вилояти Хатлон гузаронида мешаванд.

Фарзонаи УМАРАЛӢ, "ҶТ"