Китобхонаи миллии Тоҷикистон як озмуни наверо таҳти унвони “Хонандаи беҳтарини асарҳои Пешвои миллат” баргузор менамояд.

Дар ин бора аз АМИТ “Ховар” хабар доданд.

Ба гуфтаи масъулин озмун танҳо миёни донишҷӯёни муассисаҳои таҳсилоти миёна ва олии касбӣ баргузор мегардад.

Мақсад аз баргузории он арҷгузорӣ ба таърихи пурифтихори миллати тоҷик, омӯзиши амиқу ҳамаҷонибаи корнамоиҳои наҷиб ва фаъолияти шоистаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар роҳи наҷоти давлат, таҳкими ваҳдати миллӣ, эъмори модели нави давлати демократӣ, ҳуқуқбунёд, дунявӣ ва ягонаи Тоҷикистон дар шароити нави таърихӣ маънидод мегардад.

Масъулин мехорҳанд ба ин васила чеҳраҳои нави суханвару сухандонро дарёфт намоянд.

Озмун аз ду давр иборат буда, аз моҳи май то октябри соли 2024 ба таври зайл: даври якум — моҳи май дар муассисаҳои таҳсилоти миёна ва олии касбӣ; даври дуюм — ҳафтаи чоруми моҳи сентябр — ҳафтаи якуми моҳи октябр барои ғолибони ҷойҳои якум, дуюм ва сеюми даври якум дар Китобхонаи миллӣ ташкил ва гузаронида мешавад.

Ғолибони даври дуюм (ҷойҳои 1, 2, 3) баъди хатми муассисаи таҳсилоти миёна ва олии касбӣ ба ихтисоси интихобкардаашон барои идомаи таҳсил, зинаи магистратура ва маълумоти дуюми олӣ ба муҳлати се сол, бе супоридани имтиҳон тибқи тавсияномаи Вазорати маориф ва илми Ҷумхурии Точикистон ба тариқи ройгон ба Академияи идоракунии давлатии назди Президенти Ҷумҳурии Тоҷикистон ва муассисаҳои касбии баъд аз муассисаи олии таълимии мамлакат қабул мешаванд.

Ба ғолибони ҷойҳои якум ҷом, диплом ва мукофоти пулӣ тақдим мешавад. Ба ғолибони ҷойҳои дуюм ва сеюм диплом ва мукофоти пулӣ тақдим мегардад.

Дар бораи чӣ миқдор будани арзиши мукофотҳо ҳануз маълумот дода нашудааст.