Театри давлатии академии драмавии ба номи А. Лоҳутӣ мавсими навро оғоз мекунад. Маросими “Кушодашавии мавсими 95-уми театрӣ” рӯзи 20 сентябр бо намоишномаи ҷадиди “Хунхори Торросӣ” шуруъ мегардад.

Тавре маъмурияти театри мазкур иттилоъ медиҳанд, ин намоишнома аз рӯи асари драматург Азиз Несин ва бо коргардонии саркоргардони театр Султон Усмонов рӯи саҳна омадааст.

Саркоргардони Театри давлатии академии драмавии ба номи А. Лоҳутӣ Султон Усмонов гуфт, ки намоишномаи “Хунхори Торросӣ” нав буда, бори аввал дар Тоҷикистон таҳия шудааст.

- Дар намоишнома ҳунарпешагони шинохта Қурбон Собир, Ортиқ Қодир, Малика Азизмамадова ва дигарон нақшофарӣ мекунанд. Ҳамчунин, ҳунармандони ҷавон низ барои иҷрои нақшҳо ҷалб гардидаанд,-гуфт ӯ.

Бояд зикр кард, ки театри давлатии академии драмавии ба номи А. Лоҳутӣ соли қабл низ мавсими нави театриро бо намоишномаи ҷадиде бо номи “Арвоҳи беқарор” оғоз карда буд. Ин намоишнома низ аз рӯи асари драмматурги хориҷӣ Н.Коуард ва бо коргардонии Султон Усмонов таҳия гардида буд.