Китоби “Душанбе - ганҷе дар қалби Осиё”, ки аз ҷониби Муассисаи давлатии рӯзномаи “Ҷавонони Тоҷикистон” дар мувофиқа бо Мақомоти иҷроияи ҳокимияти давлатии шаҳри Душанбе таҳия гардида буд, ба нашр расид.

Китоб маҷмӯи очерку мақолаҳоеро фарогир аст, ки дар доираи як озмуни ҷумҳуриявии МД рӯзномаи “Ҷавонони Тоҷикистон” ва Раёсати кор бо ҷавонон ва варзиши шаҳри Душанбе ҷамъоварӣ шудаанд. Ин озмун давоми соли сипаришуда ба муносибати пойтахти фарҳангии ИДМ интихоб шудани шаҳри Душанбе дар соли 2021 таҳти унвони “Душанбе – ганҷе дар қалби Осиё” идома пайдо кард ва дар арафаи таҷлили чорабинии ҷамъбастии “Душанбе – пойтахти фарҳангии иттиҳод – 2021” ҷамъбаст гардид.

Маҷмуа аз ҷониби Мақомоти иҷроияи ҳокимияти давлатии шаҳри Душанбе дар доираи “Барномаи рушди иҷтимоии ҷавонон дар шаҳри Душанбе барои солҳои 2019-2021” ба чоп расидааст.

Дар маҷмӯа мақолаҳои олимон, сиёсатмадорон, журналистони касбӣ, донишҷӯён ва умуман аҳли зиёи кишвар гирдоварӣ шудааст.
Ҳамаи муаллифон аз диди тоза, нигоҳи нав, завқи баланд, зебоипарастӣ ва дар умум шаҳрдории намунавии муҳтарам Рустами Эмомалӣ бо оғӯши кушода истиқбол кардаанд.

Мансур Шоҳиён, муовини аввали директори радиои Тоҷикистон, ки мақолааш таҳти унвони “Мактаби пойтахтдории Рустами Эмомалӣ” нашр шудааст, дар ҷое чунин менависад: “Раиси шаҳри Душанбе муҳтарам Рус-тами Эмомалӣ пойтахти кишварро воқеан ба симои давлату миллат мубаддал гардонидаанд. Ин симо имрӯз барои ҳар як тоҷику тоҷикистонӣ ифтихор меофарад. Душанбе ҳам шаҳри саноатӣ, ҳам фарҳангӣ, ҳам варзишӣ, ҳам ҳунармандию сайёҳӣ ва ҳам меҳмоннавозӣ аст. Агар солҳои пеш меҳмонону сайёҳон аз муносибату муоширати сокинони пойтахт дар кӯчаву хиёбонҳо эрод мегирифтанд, имрўз дар чашму забони эшон Душанбе шаҳре бо табиати сабзу нотакрор, ободу осоишта, мардумони хушмуомилаву фарҳангӣ, шаҳри истироҳату фароғат ва гӯшае аз биҳишт аст”.

Ҳамин гуна дар ҳар як навишта эҳсос мегардад, ки ҷомеаи имрӯзаи Тоҷикистон аз шаҳрдори Душанбе розианд ва иқдомҳои эшонро ба таври шоиста таҳсину дастгирӣ мекунанд.

Китоб ба ҷуз аз он ки маҷмӯи мақолаҳоро фарогир аст, инчунин дар се бахш бо аксҳои гӯё имрӯзу дирӯзи Душанберо бозгӯӣ мекунад. “Дирӯзи Душанбе”, “Душанбе дар 25-соли соҳибистиқлолӣ (1991-2017)” ва “5-соли рушд бо Рустами Эмомалӣ” аз бахшҳоеанд, ки тариқи аксҳо марҳила ба марҳила рушд кардани пойтахти мамлакат-ро барои хонанда баён мекунад.