27-уми апрел дар толори маҷлисгоҳи “Шарқи озод” маҳфили рӯнамоии китоби “Дили ӯ равшан аз сӯзи дарун буд”, ки бахшида ба 70-солагии журналисти зиндаёд Бобоҷон Абдулвоҳидов нашр шудааст, баргузор гардид.

Маҳфили мазкур бо ибтикори фарзандони Бобоҷон Абдулвоҳидов баргузор гардида, дар он журналистону дӯстон ва ҳамкорони ин журналисти зиндаёд ҷамъ омаданд. Иштирокчиён ҳангоми баромадҳои хеш ёде аз Бобоҷон Абдулвоҳидов карда, хотираҳои доштаашонро нақл карданд.

Қайд карда шуд, ки нақши Б. Абдулвоҳидов дар рӯзномаи “Садои мардум” бисёр назаррас буд.

Китоби “Дили ӯ равшан аз сӯзи дарун буд” зери таҳрири рӯзноманигорони варзида Қироншоҳ Шарифзода ва Маҳмудҷон Усмонов рӯи чоп омада, дар он якчанд мақола аз эҷодиёти Б. Абдулвоҳидов ва ҳамчунин шоирону нависандагон ва инчунин журналистон бобати кору пайкори ин шахсияти соҳибқалам гирд оварда шудааст.

Дар охири маҳфил Шарофат Абдулвоҳидова, духтари Бобоҷон Абдулвоҳидов суханронӣ намуда, ба тамоми ҳозирин ҷиҳати иштирокашон дар маҳфил изҳори сипос намуд.

Ҳ. РАҲМАТУЛЛОЕВ, “ҶТ”