Имрӯз дар маҷлисгоҳи Вазорати фарҳанги Ҷумҳурии Тоҷикистон бо иштироки нависандагону шоирон ва ҳаводорони шеъру назми тоҷик ғолибони озмуни ҷумҳуриявии “Китоби сол” муайян ва қадрдонӣ гардиданд.

Дар чорабинии мазкур муовини вазири фарҳаг Давлат Сафар суханронӣ намуда, баргузории чунин озмунҳоро самараи дастгириву ғамхориҳои ҳамешагии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон арзёбӣ намуд.

Баъдан ғолибони озмун, дар бахшҳои китоби назм, китоби наср, асарҳои публисистӣ, асарҳои назми бачагона, асарҳои насри бачагона ва асарҳои тарҷумаи бадеӣ бо диплом ва мукофотҳои пулӣ сарфароз гардонида шуданд.

Дар озмуни мазкур китоби “Қанди додо”-и шоир Нуруллоҳи Ориф, масъули бахши назми рӯзномаи “Ҷавонони Тоҷикистон” дар бахши асарҳои назми бачагона ҷойи сеюмро ишғол намуда, бо дипломи дараҷаи 3 ва маблағи пулӣ дар ҳаҷми 500 сомонӣ сарфароз гардонида шуд.

Бояд гуфт, ки Нуруллоҳи Ориф пайваста дар чунин озмунҳои сатҳи ҷумҳуриявӣ бо шеърҳои волои худ иштирок намуда, ҷойҳои намоёнро сазовор мегардад. Соли гузашта низ дар ин озмун китоби бачагонааш бо номи “Барбоси ман” соҳиби ҷоиза гардида буд.