29 октябр дар Китобхонаи миллии Тоҷикистон ба муносибати 30-солагии қабули Конститутсияи Ҷумҳурии Тоҷикистон ва “Соли маърифати ҳуқуқӣ” зери унвони “Конститутсияи Ҷумҳурии Тоҷикистон - кафили таъмини ҳуқуқ ва озодиҳои шахсӣ” конференсияи ҷумҳуриявӣ баргузор гардид.

Конференсияи мазкур бо ташаббуси Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон дар ҳамкорӣ бо Маркази исломшиносии назди Президенти Ҷумҳурии Тоҷикистон ва Ҳизби Халқии Демократии Тоҷикистон доир гашт, ки дар он намоядагони вазорату идораҳо ва ташкилоту муассисаҳои давлатӣ, олимону коршиносон, намояндагони ташкилотҳои байналмиливу ҷамъиятӣ, инчунин намояндагони иттиҳодияҳои динӣ иштирок варзиданд.

Дар қисмати аввали кори конференсия сардори шуъбаи дин, танзими анъана ва ҷашну маросими Дастгоҳи иҷроияи Президенти Ҷумҳурии Тоҷикистон Саидаъзам Қодирзода ва мувоини якуми раиси Ҳизби Халқии Демократии Тоҷикистон Абдуҷаббор Азизӣ баромад намуда, нақши Конститутсия ва меъёрҳои инсондӯстонаи онро дар таъмини ҳуқуқу озодиҳои фитрии инсон муҳим арзёбӣ намуданд.

Дар идома, дигар намояндагон аз мақомоти гуногун вобаста ба 30-солагии қабули Конститутсияи Ҷумҳурии Тоҷикистон ва соли “Маърифати ҳуқуқӣ” суханронӣ намуданд.

Дар қисмати дигари корнференсия Сулаймон Давлатзода, раиси Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон суханронӣ намуда, фаъолияти озодонаи беш аз 4 ҳазор иттиҳодияи динӣ дар кишвар, ҳамкории босамари мақоми ваколатдори давлатӣ дар соҳаи дин бо иттиҳодияҳои динӣ, ташкили фазо, шароит ва имкониятҳои мусоиду баробар ҷиҳати таъмини эҳтиёҷоти динии пайравони динҳои гуногун ва ба ин васила эҷод гардидани фазои ҳамгироӣ ва таҳаммулпазирӣ дар кишварро натиҷаи татбиқи босамари меъёрҳои Конститутсия Тоҷикистон арзёбӣ намуд.

Номбурда таъкид дошт, ки имрӯз дар кишвар дар баробари чор ҳазор масҷид инчунин 66 иттиҳодияҳои динии ғайриисломӣ низ озодона фаъолият менамоянд.

Дар идомаи конференсия дар мавриди заминаҳои қонунии таъмини ҳуқуқу озодиҳои шаҳрвандон, аз ҷумла озодии пайравӣ ба дин, нақши ҳамкорӣ бо мақоми ваколатдори давлатӣ оид ба дин дар таъмини ҳуқуқу озодиҳои пайравони динҳои гуногун дар кишвар ва монанди он гуфта шуд.

Ҳамчунин, дар кори конференсия раиси Шурои уламои Маркази исломии Ҷумҳурии Тоҷикистон Саидмукаррам Абдуқодирзода, муовини роҳбари Епархияи Душанбегии Калисои православии Рус Алексей Телехов, роҳбари ҷамоатхонаи шиаи имомии исмоилӣ дар шаҳри Душанбе Маҳрамбеков Маҳрамбек ва масъули робита бо ҷомеаи маҳфили руҳониёни миллии Баҳоиёни Тоҷикистон Меҳрангез Мамедова вобаста ба нақши Конститутсия дар таъмини ҳуқуқу озодиҳои эътиқодии шаҳрвандон ва таҳаммулпазирӣ миёни пайравони динҳои гуногун изҳори назар намуда, заминаҳои қонунгузории кишварро ҷиҳати татбиқи озодиҳои эътиқодии худ қонеъкунанда арзёбӣ намуданд.

Дар поёни кори конференсия миёни иштирокдорон табодули афкор сурат ва муколамаи судманд сурат гирифт.

Фарзонаи УМАРАЛӢ, “ҶТ”