6 сентябр соати 10:00 маҷаллаи ҳаҷвии «Хорпуштак» дар даромадгоҳи бинои КТН “Шарқи озод” чорабинии фарҳангӣ таҳти унвони “Мастер-класс” баргузор мекунад.

Дар он рассомон-ҳаҷвнигорон (карикатуристон)-и ҳаваскор ҳунари худро ба тамошобинон пешкаш мекунанд.

Ин чорабини ба мақсади 90 солагии маҷаллаи мазкур ва ҷалби рассомон-ҳаҷвнигорон (карикатуристон)-и ҷавон гузаронида мешавад.

Шумораи нахустини ин маҷаллаи ҳаҷвии “Хорпуштак” соли 1926 ба дасти хонанда расидааст.

Маҷалла дар солҳои гуногун бо номҳои "Мулло Мушфиқӣ", "Калтак", "Бигиз", "Мушфиқӣ", "Хоҷа Насриддин" чоп шуда, номи "Хорпуштак"-ро соли 1953 гирифтааст.

Дар давраи Шӯравӣ ин маҷалла бисёр бонуфӯз буд. Он бо тиражи бештар аз 100-120 ҳазор нусха, дар ҳаҷми 12 саҳифаи ранга, бо мусаввараҳои ҷолиби пурмазмун моҳе ду маротиба ба табъ мерасид.