ФАРҲАНГ
Ҷумъа 04 Декабр 2020 12:42
7477
17-уми октябр дар шаҳри Бохтар ба муносибати ҷашни Меҳргон чорабинии тантанавӣ бо намоиши маҳсулоти кишоварзӣ, шолӣ, биринҷ ва озмуни “Оши палов” баргузор гардид.

Ҳайати роҳбарият ва меҳмонон аз намоиши техникаи кишоварзӣ, маҳсулоти кишоварзию саноатӣ, маҳсулоти нонӣ, ҳунарҳои мардумӣ ва маҳорати ошпазҳо дидан намуданд.

Раиси вилоят Қурбон Ҳакимзода зимни баромади худ зикр намуд, ки нақши барзгарони вилояти Хатлон дар беҳдошти зиндагии мардум назаррас мебошад, зеро деҳқонони асили Хатлонзамин дар саҳро аҳлона меҳнат намуда, дар таъмини бозори дохилӣ бо маҳсулоти аълосифат ва аз ҷиҳати экологӣ тоза саҳми муносиб гузошта истодаанд. Ҳамчунин раиси вилоят дар бораи фаъолияти кишоварзони ҷавон махсусан ёдовар шуда гуфт:

“Иштироки фаъоли ҷавонони вилоят баробари дигар қишрҳои ҷомеъа аз он шаҳодат медиҳад, ки имрӯз ҷавонон ҳамчун пахтакорон, ғаллакорон, боғу токпарварон, чорводорон ва механизаторони меҳнатқарин бо ғайрати дучанд заҳмат кашида, баҳри пешрафти иқтисодиёти кишвар саҳми арзанда гузошта истодаанд”.

Пас аз қисмати расмии чорабинӣ бахши фарҳангии чорабинӣ идома ёфт ва дар ин бахш ҳунармандон маҳорату зунари худро нишон доданд.

Баъдан маросими тақдими ҷоизаҳо ба ғолибони озмуни “Беҳтарин намоиши ҷашнӣ” - Кӯшониён (ҷойи якум), Данғара (ҷойи дуюм), Фархор (ҷойи сеюм), “Намоиши шолӣ ва биринҷ” – Қубодиён(ҷойи якум), Ҷайҳун (ҷойи дуюм), Хуросон (ҷойи сеюм), озмуни “Оши палов” – Ёвон (ҷойи якум), Кӯлоб (ҷойи дуюм), Ҷалолиддини Балхӣ (ҷойи сеюм) баргузор гардид. Ҳамчунин ба ғолибони озмуни “Сабзирезакуни беҳтарин”, “Ошпази беҳтарин” ва “Ошхӯри беҳтарин” ҳадяҳои мақомоти иҷроияи ҳокимияти давлатии вилоятро тақдим гардид.

Эзоҳи худро нависед



Рамзҳо дар расм