ФАРҲАНГ
Ҷумъа 16 Апрел 2021 07:49
7896
Бардошт аз як фестифали фарҳангии ҷавонони хориҷӣ, ки тантанаи Наврӯзро дар ватанаш шукуҳ бахшид

Субҳи 17 март. Саҳни Кумитаи кор бо ҷавонон ва варзиши назди Ҳукумати Ҷумҳурии Тоҷикистон аз рӯзҳои қаблӣ фарқ дошт. Ҷавонони ороста ва духтарони чаканпӯшу атласпӯш бо зебогии худ мисли гулҳои баҳорӣ саҳни кумитаро зеб медоданд.

Ҷавонон аз 12 ишвари ҷаҳон либосҳои миллии тоҷикӣ ба бар дар доираи сеюмин Фестивали фарҳангии ҷавонони хориҷӣ зери шиори “Дӯстии ҷавонони ҷаҳон поянда бод!” барои истиқболи Наврӯзи байналмилалӣ ҷамъ омаданд. Тибқи нақша онҳо бояд Наврӯзи ҷаҳониро дар ноҳияи Мастчоҳ ҷашн гиранд. Мо ба роҳ баромадем...

17 нақлиёте, ки дар онҳо ҷавонон нишаста буданд, дар масири шоҳроҳи Душанбе-Хуҷанд аз дигарон фарқкунанда буд. Сару рӯи ин сабукравҳо бо шиору овезаҳои “Пайравони пешвои миллатем”, “Салом Наврӯзи ҷаҳонӣ”, “Дӯстии ҷавонони ҷаҳон поянда бод!” ва “Мо ба Мастчоҳ меравем” раҳораҳ мужда аз омад-омади ин ҷашни аҷдодӣ медоданд. Қатори мошинҳо аз миёни кӯҳҳои осмонбӯси ноҳияи Варзоб мегузашт ва табиати афсункори ин ноҳия бо қабои баҳоргуна ба сафари ҷавонон кайфиати дигаре зам мекард.

Он рӯз дар ағбаҳое, ки чанд моҳи охир тармафароию боришоти зиёди барф ба назар мерасид, бо адолати Парвардигор офтоби чеҳрахандон нурҳои худро аз пушти кӯҳҳои барфпӯш саховатмандона ҷониби мо мепошиданд. Он кӯҳҳо, ки пири хирадро мемонданд, гӯё бо аз назар гузаронидани ҳар яке аз ҷавонон оҳи ҳасрат мекашиданду аз он замони шубобашон ёд мекарданд...

ДАР ЗИЁРАТИ НАҚИБХОН ТУҒРАЛ...

Баъди пушти сар шудани кӯҳҳои барфпӯш қатори мошинҳо вориди ноҳияи Айнӣ шуд. Ба истиқболи ҷавонон раиси ноҳия Муродзода Муқим ва сокинони ноҳия баромада, меҳмононро зери навои савту мусиқӣ бо нону ширинӣ ва рамзи асосии Наврӯз - суманак пешвоз гирифтанд. Баъди истиқболи гарм ҷавонон баҳри арҷ гузоштан ба охирин намояндаи адабиёти классики форсу тоҷик - Нақибхон Туғрал, ба зиёрати мақбараи ӯ рафтанд. Масъулин дар баробари ҷавонони кишвар ба меҳмонони хориҷ оид ба рӯзгори ин шоири бузурги тоҷик маълумоти муфассал доданд.

ҚАЛЪАИ “МУҒ” НИШОНЕ АЗ ТАЪРИХИ БОСТОН

Қатори мошинҳо ҷавононро ба шаҳри Истаравшан бурд. Шаҳри замонавию дорои таърихи қадим. Дар маркази шаҳр ҷавонони истаравшанӣ ҳамсолони худро бо гулу гулдаста пешвоз гирифтанд. Баъдан ҳамагон ба тамошои қалъаи Муғ рафтанд. Тамошои мавзеи таърихию пешниҳоди маълумоти муфассал аз таърихи қалъа, саёҳати ҷавононро рангитар намуд.

Тамошои Коллеҷи ҳунарҳои мардумӣ маконе буд, ки ҳунарҳои мардумии миллати тоҷикро ба ҷавонон муаррифӣ намуд.

Бо ҳамин мо роҳ пеш гирифтем ба самти шаҳри Хуҷанд. Субҳи 18 март. Соҳили дарёи Сир бо ҷавонон пероставу зиннатёфта буд. Меҳмонхонаи “Суғдиён”, ки дар соҳили дарёи мазкур ҷойгир аст, дар шафати худ Боғи фарҳангии ба номи Камоли Хуҷандиро ҷой додааст. Баъди азнавсозии меҳмонхонаи мазкур дар доираи иншоотҳои ба муносибати 30-солагии ҷашни умумимиллӣ - Истиқлоли давлатӣ мавзеи мазкур таърихию тамошобоб гардидааст. Ҷой доштани чтарабхонаи “Темурмалик” дар лаби дарё, ки шакли киштӣ дорад ва қомат афрохтани нимпайкараҳои Томирис, Деваштич, Абуалӣ Ибни Сино, Абумаҳмуди Хуҷандӣ, Бобоҷон Ғафурову Осорхонаи ба номи Камоли Хуҷандӣ муҳити омӯзандае буд, ки ба ҷавонон аз таърихи миллати тоҷик қисса мекард.

МО БА МАСТЧОҲ МЕРАВЕМ...

Ҷавонон бо шиорҳои “Мо пайравони Пешвои миллатем”, “Тоҷикистон ба пеш”... бо қатори мошинҳо роҳ сӯи ноҳияи Мастчоҳ гирифтанд.

Беҳуда Наврӯзро ҷашни эҳёи табиат намегӯянд. Ҷӯшу хурӯши ҷавононро дида, шамоли файзбори табиат қад-қади роҳ парчамҳои парафшону дарахтони сари роҳро ба рақс медаровард. Мисле, ки дар баробари хурсандии сокинони ноҳия табиат ҳам аз ташрифи ҷавонон хушнудӣ мекард.
Баробари расидан ба даромадгоҳи ноҳия, сокинони Мастчоҳ сар аз раиси ноҳия бо карнаю сурнай, зери навои наврӯзӣ ҷавононро истиқбол гирифтанд.

30 СОЛИ БУНЁДКОРӢ

Миллати тоҷикро мардуми бунёдкор мегӯянд. Сохтани давлати сирф миллӣ, бунёди ҳазорон иншоотҳо ва эҳёи шаҳраку деҳоти нав давоми 30 соли соҳибистиқлолӣ зери роҳбарии бунёдкоронаи Асосгузори сулҳу ваҳдати миллӣ -Пешвои миллат муҳтарам Эмомалӣ Раҳмон ҷавоб ба гуфтаҳои боло мебошад.
Ноҳияи Мастчоҳ ҳам аз зумраи ноҳияҳои дурдасти кишвар мебошад, ки бо таваҷҷуҳ ва иқдомҳои бевоситаи Пешвои Миллат аз нав бунёд шуда, ба як ноҳияи замонавӣ табдил ёфтааст. Бунёди инфрасохтори замонавӣ, аз нав эҳё намудани ҳунарҳои миллии дар садади нестшавӣ қарордошта ин гӯшаи дурдасти кишварро ба як макони диданӣ табдил додааст.

Бунёди қасри фарҳангие, ки дар доираи иншоотҳои ҷашни 30- солагии Истиқлолияти кишвар дар ноҳияи мазкур сохта шудааст аз беназиртарин қасрҳо дар кишвар мебошад. Қасри мазкур соли 2020 аз ҷониби Пешвои миллат ифтитоҳ гардида, мавриди баҳрабардорӣ қарор гирифт.
Қасри фарҳанги ноҳияи Мастчоҳ аз 3 ошёна ва таҳхона иборат буда, дар он тамоми шароит барои кормандон ва аҳолӣ муҳайё мебошад. Толори барҳавои иншооти фарҳангӣ барои 1000 нафар пешбинӣ шудааст.
Даромадгоҳ, толор ва утоқҳои иншоот бо дарназардошти таъриху фарҳанги ғании қадимаи миллати куҳанбунёди тоҷик кандакориву наққошӣ гардидааст. Девору сақфи бинои навбунёд низ бо нақшу нигори миллӣ ороиш дода шудааст, ки аз санъати волои меъмории миллӣ дарак медиҳад.
Бинои Қасри фарҳанг дорои ҳуҷраҳои барҳавои замонавӣ барои баргузории маҳфилҳои рубобнавозону доиранавозон, шашмақомсароӣ, раққосӣ, рассомӣ, ҳунармандӣ, китобхонаи бачагона, толори хониш ва бозии шоҳмот мебошад.

ДӮСТИИ ҶАВОНОНИ ҶАҲОН ПОЯНДА БОД

Баъди намоиши ҳунарҳои мардумию нишон додани бозиҳои миллии варзишии наврӯзӣ дар Қасри фарҳанг консерт зери унвони “Дӯстии ҷавонони ҷаҳон поянда бод” баргузор гардид. Дар оғози барномаи фарҳангӣ раиси ноҳияи Мастчоҳ Тоҳир Азиззода аз ташаббускорони Сеюмин фестивали дӯстии ҷавонони ҷаҳон - Кумитаи кор бо ҷавонон ва варзиши назди Ҳукумати Ҷумҳурии Тоҷикистон барои гузарондани чорабинии мазкур изҳори сипос намуда, чунин гуфт:

- Дар баробари тамоми ҷавонони Тоҷикистон ҷавонони ноҳияи Мастчоҳ низ барои ободию шукуфоии диёру Ватани худ содиқонаву софдилона саъю талош намудаистодаанд. Боиси ифтихору шодмонии тамоми ҷавонони ноҳия аст, ки моҳи сентябри соли 2020 зимни сафари кории Пешвои муаззами миллат муҳтарам Эмомалӣ Раҳмон ба ноҳияи Мастчоҳ 51 иншооти таъйиноти саноатию иҷтимоӣ, фарҳангӣ, таълимӣ ба маблағи умумии 190 миллион сомонӣ ба истифода дода шуд, ки дар ифтитоҳи 17 адад иншоот Президенти ҷавонпарвару маҳбуби мо бевосита ширкат варзиданд. Зимни ин сафари Президент ба истифода дода шудани иншоотҳои замонавии муассисаи таҳсилоти миёнаи умумии №42 дар маҳаллаи “Ганҷобод”-и шаҳраки Суғдиён, майдони Парчами давлатӣ, қасри муосири фарҳанг барои 1000 ҷойи нишаст, варзишгоҳи марказӣ барои 10000 ҷой, қасри варзишии “Паҳлавонони суғдӣ”, боғи фарҳангу фароғати “Тоҷикистон” бевосита ба ҳаёти ҷавонони ноҳия алоқаманд буда, гувоҳи барҷастаи ғамхории роҳбарияти олии давлату Ҳукумат ба ин неруи созандаву бунёдкор ба шумор меравад.

Ҳамчунин, дар идома раиси ноҳия зикр кард, ки ҷашни Наврӯз дар баробари дигар гӯшаву канори кишвари азизамон дар зодгоҳи мо низ бо тамоми санъату назокаташ таҷлил карда мешавад. Сокинони ҳар як деҳаи Мастчоҳ ин иди волои ниёгонро бо шодию хурсандӣ ҷашн мегиранд. Бинобар ин, баргузории Фестивали имрӯза дар рӯзҳои таҷлили ҷашни Наврӯз як умр дар ёди ҷавонон боқӣ мемонад, ҷаҳду талош ва ғайрату неруи онҳоро дар таҳкими дӯстию ҳамкорӣ ва ваҳдату созандагӣ бештар мегардонад.
Баъдан Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ҳозиринро ба бузургтарин иди миллии мардуми тоҷик - Наврӯзи байналмилалӣ табрик намуд. Аз ҷумла раиси кумита иброз намуданд, ки Наврӯз аз бузургтарин ҷашнҳои мардумони эронитабор, аз ҷумла тоҷикон ба шумор меравад, ки ба фарҳанги қавму миллатҳои дигари Осиёи Марказӣ низ бо ҳамин ном, яъне номи тоҷикона “Наврӯз” гузаштааст.

- Ҷашни Наврӯз дар баробари ба вуқӯъ омадани ҳодисаҳои гуногуни сиёсию иҷтимоӣ ва маънавӣ то ба имрӯз мавқеъ ва рисолати ободкорӣ, корҳои созандагӣ ва дӯстию рафоқатро гум накарда, баръакс ҳамасола ривоҷу равнақи тоза гирифта, таваҷҷуҳи халқияту миллатҳои дигарро ба худ ҷалб мекунад.
Наврўз ҷашнест, ки на танҳо аз сабзидану шукуфтанҳо паём медиҳад, балки дар худ рисолати ваҳдатофаринию сулҳу бахшишҳоро таҷассум менамояд ва имрӯз намояндагони халқияту миллатҳои гуногун бо тоҷикон дар фазои дӯстиву рафоқат зиндагӣ карда, онро бо эҳтироми зиёд ва самимона истиқбол менамоянд. Ҳамин ҷамъ омадани ҷавонони хориҷ худ далел аз бузургии ин ҷашн аст,- гуфт, раиси кумита.
Ҳамзамон, табрикоти раиси вилояти Суғд Раҷаббой Аҳмадзода аз ҷониби намояндаи дастгоҳи раиси вилоят ба иштирокчиён ироа шуд. Баъдан барномаи фарҳангии муштараки “Дӯстии ҷавонони ҷаҳон поянда бод” пешкаши ҳозирин гардид. Ҷиҳати ҷолиби диққати ин барномаи фарҳангӣ дар он буд, ки аксар ҷавонони хориҷ бо забони тоҷикӣ сурудхонӣ намуданд.

ҲУНАРҲОИ МИЛЛӢ - НИШОНЕ АЗ ФАРҲАНГИ ПУРҒАНОВАТИ ТОҶИК

Сокинони ноҳияи Мастчоҳ ба истиқболи ҷавонон аз дохил ва хориҷи кишвар, дастурхони ҳафтсину ҳафтшин оростанд. Ҳамзамон баҳри муаррифии фарҳанги ин гӯшаи дурдасти кишвар намоиши ҳунарҳои мардумиро, ки ҳамагӣ ифодагари миллати соҳибтамаддуни тоҷик буд, ба марази тамошо гузоштанд. Намоиши мазкур аз ҷониби иштирокчиён хуш пазируфта шуда, махсусан ҷавонони хориҷ бо пешниҳоди суолҳо аз нозукиҳои ҳунарҳои қадимаи мардуми ин гӯшаи диёр огоҳ шудан мехостанд.

Нимаи дуюми 18 март дар доираи нақшаи сеюмин Фестивали ҷавонони хориҷ иштирокчиён мавзеъҳои фарҳангию таърихии ноҳияи Бобоҷон Ғафуровро сайр намуданд. Масъулин иштирокчиёнро бо Боғи фарҳангии Ваҳдат шинос намуданд. Баъди сайёҳат дар боғи мазкур ҷавонон аз Муассисаи давлатии Қасри Арбоб низ дидан намуданд. Зимни боздид оид ба паҳлуҳои меъморию таърихии қасри мазкур ба иштирокчиён маълумот дода шуд. Маконҳои тамошобоб ва мавзеъҳои таърихии ин ноҳия барои ҷавонон, хусусан ҷавонони хориҷ ҷолиб буд. Онҳо бо шавқ ба ҳар гӯшаи зебои ноҳияи Бобоҷон Ғафуров менигаристанд.

ШОМИ ҶАВОНӢ

Фестивали мазкур, ки дар арафаи истиқбол аз ҷашни байналмилалии Наврӯз бо иштироки ҷавонони дохилу хориҷ баргузор гардид, бо барномаи ҷолиби консертӣ ҷамъбаст шуд. Дар фарҷоми Фестивал раиси вилояти Суғд муҳтарам Раҷаббой Аҳмадзода барои ҷавонон дастурхони идона ороста, бевосита иштирокчии барномаи Шоми ҷавонӣ шуданд.

Ӯ дар оғози чорабинӣ аз сиёсати ҷавонпарваронаи Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон ёдовар шуда, Наврӯзи байналмилалиро ба ҳамагон шодбош намуданд. Дар навбати худ Абдулло Раҳмонзода ба раиси вилоят ҷиҳати пайравияшон ба сиёсати ҷавонпарваронаи Пешвои миллат ва татбиқи барномаҳои соҳаи ҷавонон ва варзиш дар вилоят изҳори миннатдорӣ намуданд.
Аз чеҳраи шоду рӯҳияи болидаи ҳар ҷавони иштирокчӣ маълум буд, ки аз саёҳат дар вилояти Суғд қаноатманду сипосманданд. Онҳо ба ҳамдигар аз таассуротҳояшон мегуфтанд. Шукр аз фазои осоиштаи меҳан менамуданду ифтихорманд аз он буданд, ки ҷавонони ин кишвари тамаддунофаранд. Ҷавонони хориҷ аз кишвар низ ба давлату Ҳукумати Тоҷикистон баҳри дастгириҳои ин неруи созандаи кишвар аҳсан мехонданд. Ҳаво низ чун чеҳраҳои ҷавонони хуштолеъ дурахшон буд. Ҷашни Наврӯзи фархундапай дар қалбу симои иштирокдорон ва фазои он ҷо бошукӯҳ тантана дошт.

Сеюмин Фестивали байналмилалии фарҳангии ҷавонони хориҷӣ зери шиори “Дӯстии ҷавонони ҷаҳон поянда бод” дар фазои дӯстии ҷавонон аз ҳар гӯшаи ҷаҳон хотирмону ҷолиб ба анҷом расид.

Шодихони НАЗАР, “ҶТ”
Душанбе – Айнӣ – Истаравшан – Хуҷанд – Мастчоҳ –Душанбе

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2

Апрел 2021 c.