Байни шоирон ва нависандагони Афғонистон, Тоҷикистон ва Эрон аввалин озмуни байналмиллалии “Порсӣ ватан аст” баргузор мешавад. Ин озмун аз сӯи бунёди “Шаҳид Аҳмадшоҳи Масъуд” ва “Муассисаи фарҳангии дурри дарӣ” ташкил шудааст.

Дар ин бора “Адабиёт ва санъат” - нашрияи Иттифоқи нависандагони Тоҷикистон хабар додааст.

Ба гуфтаи манбаъ озмуни “Порсӣ ватан аст” дар бахшҳои шеър (сунатӣ ва озод), қисса, ҳикоя ва мақола сурат мегирад. Тибқи талаботи озмун мавзӯи шеър ва ҳикояро бояд забони форсӣ ва пайванди миллату қавмҳо, нақши забони форсӣ дар рушди тафаккур ва фарҳанги башарӣ ва ғайраро фаро гирад.

Мавзӯи бахши мақолаи озмун хостгоҳи забони форсӣ, густараи ҷуғрофиёии забони форсӣ қабл аз Ислом, нақши Сомониён дар густариши забони форсӣ ва ғайраро ташкил медиҳад.
Бояд гуфт, ки барои иштирок дар озмуни мазкур сину сол маҳдуд набуда, забони пешниҳоди асарҳо бояд форсии тоҷикӣ бошанд.

Дар ҳар бахши озмун се нафар ғолиб ва 5 нафари шоиста қадрдонӣ хоҳад шуд. Ғолибони се зинаи бахши шеър, қисса ва ҳикоя соҳиби 5, 3 ва 2 миллион тумон мешаванд. 5 нафари дигар 1 миллион тумонӣ ҷоиза мегиранд.

Барандагони бахши мақоларо 7, 5 ва 3 миллион тумонӣ интизор буда, ҷоизаи касони шоистаи тақдири ин бахш 3 миллион тумонӣ дар назар аст.

Ёдовар мешавем, асарҳо барои озмуни “Порсӣ ватан аст” бояд то 10 марти соли равон тариқи почтаи электронии мазкур Parsi.Watan.ast@gmail.com ирсол карда шавад.

Сайёраи ҚИЁМИДДИН, “ҶТ”