Дар доираи чорабиниҳои фарҳангӣ бахшида ба 35-солагии Истиқлоли давлатии Ҷумҳурии Тоҷикистон 16 август дар "Боғи Ирам"-и шаҳри Душанбе рӯзи фарҳангии ноҳияи Рӯшон баргузор гардид.

Дар чорабинӣ муовини раиси шаҳри Душанбе, намояндаи Ҳукумати Ҷумҳурии Тоҷикистон дар ноҳияи Рӯшон, раиси ноҳияи Исмоили Сомонии шаҳри Душанбе, раиси ноҳияи Рӯшон ва намояндагони сохторҳои гуногун иштирок намуданд.

Нахуст меҳмононро дар даромадгоҳи "Боғи Ирам" санъаткорону ҳунармандони ноҳияи Рӯшон бо самимияти хоса, нону намак ва расму оинҳои миллӣ истиқбол гирифтанд. Ҳунармандон бо либосҳои зебои миллӣ намунаҳои фарҳангу ҳунари мардумии Рӯшонро ба меҳмонон муаррифӣ намуданд.

Меҳмонон аз намоиши маҳсулоти кишоварзӣ, ҳунарҳои мардумӣ ва дастовардҳои соҳаҳои гуногуни ноҳия дидан карданд. Дар гӯшаҳои алоҳида анъанаҳои қадима, расму оин ва фарҳанги мардуми Рӯшон муаррифӣ гардид.

Яке аз бахшҳои ҷолиби чорабинӣ муаррифии анъанаи омодасозии арӯс дар хонаи суннатии бадахшонӣ буд, ки таваҷҷуҳи меҳмононро ба худ ҷалб намуд. Дар ин гӯша иштирокчиён бо урфу одат ва суннатҳои қадимаи мардуми Рӯшон аз наздик шинос шуданд.

Ҳамчунин, бонувони ҳунарманди ноҳия маҳорати худро дар омода намудани таомҳои миллӣ нишон дода, навъҳои гуногуни хӯрокҳои анъанавии мардуми Рӯшонро пешкаши меҳмонон намуданд.

Барномаи фарҳангии санъаткорони ноҳия ҳамчун армуғони идона ба чорабинӣ ҳусни анҷом бахшида, табъи меҳмонон ва сокинони пойтахтро болида гардонид.

М. МУҚАДДАМОВА, “ҶТ”