Соати 16-и имрӯз дар Кохи Суруши шаҳри Душанбе 112 – солагии таъсиси аввалин нашрияи тоҷикӣ – “Бухорои шариф” ё Рӯзи матбуоти тоҷик ҷашн гирифта мешавад.

Дар ин бора Зиннатуллоҳ Исмоилзода, раиси Иттифоқи журналистони Тоҷикистон иттилоъ дод.

Ба гуфтаи Зиннатуллоҳ Исмоилзода, Иттифоқи журналистони Тоҷикистон ва Вазорати фарҳанг имсол ба чунин хулоса омадаанд, ки ҷашни Рӯзи матбуотро каме бошукуҳтар таҷлил кунанд.

Зимни баргузории маросими Рӯзи матбуот ба рӯзноманигорон Ҷоизаи Иттифоқи журналистони Тоҷикистон ба номи Абулқосим Лоҳутӣ, унвонҳои Аълочии матбуоту фарҳанг, сипосномаву ифтихорномаҳо аз вазорату идораҳо тақдим хоҳад шуд. Ба гуфтаи раиси ИЖТ дар чорабинии мазкур иштироки сарояндаҳои саршиноси кишвар низ дар назар аст.

Дар гузашта ҷиҳати ба таври шоиста таҷлил нагаштани Рӯзи матбуот расонаҳо ва журналистони алоҳида масъулинро пайваста танқид мекарданд. Дар солҳои охир нахустин бор аст, ки ин иди касбӣ дар чунин толори боҳашамат таҷлил мегардад.