Имрӯз – 13 январ Раиси Маҷлиси миллии Маҷлиси Олии Ҷумҳурии Тоҷикистон, раиси шаҳри Душанбе муҳтарам Рустам Эмомалӣ бо як зумра аз бостоншиносон, таърихнигорон, фарҳангшиносон ва дигар намояндагони илму адаб вохӯрӣ кард.



Дар ин бора саҳифаи телеграмии шаҳрдори Душанбе хабар додааст.

Ба иттилои манбаъ дар мулоқот масъалаи бунёди Маҷмааи эҳёи хотираи таърихӣ ва таҳкими ҳувияти миллӣ дар шаҳри Душанбе мавриди муҳокима қарор гирифта, иштирокдорон аз иқдоми навбатии муҳтарам Рустам Эмомалӣ истиқбол карда, роҷеъ ба он фикру андешаҳои худро баён доштанд.

Ёдовар мешавем, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми охирашон ба Маҷлиси Олӣ дар масъалаи таҳкими ҳувияти миллӣ ва худшиносии миллӣ ба таври ҷиддӣ изҳори назар карда, аз масъулин хоста буданд, ки барои боло бурдани ҳисси худшиносии миллии аҳли ҷомеа чораҳои зарурӣ андешанд.

Ҳамчунин, бо дастури Роҳбари давлат, ки дар Паём зикр шуд, бояд дар шаҳри Душанбе Маркази тамаддуни ориёӣ ва Маркази байналмилалии Наврӯз бунёд карда шавад.