Шаҳрдории Душанбе барои тахриби фрескаи таърихии “Шашмақом”, ки дар собиқ бинои телевизиони “Сафина” ҷойгир буд иҷоза надодааст. Дар ин бора аз ширкате, ки қарор аст дар макони қаблии бинои “Сафина” маркази тиҷоратии нав созад, расонаҳо хабар додаанд.

Бо дастури шаҳрдори Душанбе тасмим гирифта шудааст, ки он боқӣ монад ва ҳоло масъулини ширкат бо мутахассисони аврупоӣ дар соҳаи таъмиру барқарорсозӣ музокирот карда истодаанд. Дар назар аст, ки мозаикаро барканда, барқарор ва дар ҳудуди маркази тиҷоратӣ насб кунанд.

Бояд гуфт, ки ин ороиши мозаикаи нодир кори рассоми маъруф Асрор Аминҷонов буда, яке аз маъруфтарин мозаикаҳо дар шаҳри Душанбе аст. Солҳои 60-ум дар бинои собиқи телевизони “Сафина” Филармонияи давлатӣ ҷойгир буд. Баъдан аз соли 2005 он ба бинои шабакаи телевизионии “Сафина” табдил ёфт.

Ахиран аз шаҳрдории пойтахт иттилоъ дода шуд, ки баъди кӯчидани ин телевизион ба бинои наву замонавӣ дар ҷойи он маркази тиҷоратии нав сохта мешавад.

Сайёраи ҚИЁМИДДИН, “ҶТ”