ФАРҲАНГ
Чоршанбе 17 Август 2022 06:05
3377
Дар ин дунёи пурасрор зистану кашф кардани накҳату зебоиҳои атроф ва онро ба дигарон тавассути шеър пешкаш сохтан аз инсон диди бисёр ҳассосу амиқро тақозо менамояд. Зеро дар олами шеър чизе иншо намудан ба ҳар кас муяссар намегардад. Танҳо ҳамоне дар роҳи шеъру шоирӣ фатҳи қуллаи мурод менамояду дурдонаҳои бебаҳоро аз қаъри баҳри беохири сухан дармеёбад, ки боистеъдод ва ошиқи ин ҷода аст.

Шоирабонуи Раҳимҷон яке аз бонуи шеъри тоҷик мебошад, ки имрӯз дар олами шеър ҷойгоҳи махсус дорад. Дар ҳоле ки ҳеч яке аз аъзои оилааш моили шеъру бадеъият набуданд, Шоираи кӯчак ҳануз аз айёми 10-солагӣ дурри шеър месуфт.

Шоира хатмкардаи ДДМТ, факултети филологияи тоҷик буда, балоғати шеърҳояш дар айёми ҷавонӣ бештар рӯ мешуданд, зеро рӯзгори донишҷӯӣ, солҳои ноороми он давра ба рӯҳи бонуи эҷод таъсир расонида буданд. Пушти девори эҷод Шоирабону солиёни зиёд дар “Радиои Тоҷикистон” ба сифати муҳаррир фаъолияти корӣ намудааст. Аввалин намунаи шеърҳояш соли 2003 бо номи “Нахустин номаҳои дард” интишор шуда, китоби дувумаш соли 2013 бо исми “Вопасин номаҳои дард” дастраси ихлосмандони шеъраш гардидааст.

Шоирабону соли 2012 дар машварати адибони ҷавон ҳамчун шоири суруднавис узви Иттифоқи нависандагон гардид. Ӯ бо пайвандии шеъраш бо оҳанг дунёи дигари эҷодро фарохтар аз марзи шеър ба ҳаводоронаш нишон дод. Шоира бо ҳунармандони машҳури кишвар ҳамкории қавӣ дошта, чандин сурудҳои маъмули эшон аз хазинаи эҷоди ин бонуи шеър мебошанд.

Ҳамчунин, Шоирабону аспиранти шуъбаи ғоибонаи Институти забон, адабиёт, шарқшиносӣ ва мероси хаттии Академияи илмҳои Ҷумҳурии Тоҷикистон буда, айни ҳол муаллимаи калони фанни балоғати суханварии Донишкадаи такмили ихтисос барои мактабҳои олӣ мебошад.

Дар зимн суҳбати мо бо ин бонуи шеър пешкаш мегардад.

- Ба назари Шумо шеър чист ва он бояд ба хонанда чӣ бахшад?

- Шеър бемориест, ки касони махсус ва интихобшуда мубталояш мешаванд. Интихобгар худи ӯст. Ва чун агар интихобгардидаӣ, дигар бастаи ин ҳолу ҳавоӣ. Шеър ҳолати девонагист, гирифторист, зебоист!

Шеър табиист ки ба хонанда ғизо бояд бубахшад. Вагарна чӣ ҳоҷат аз ҳарфи ҳарза. Шеър бояд дармон бошад ба захмҳои хонандааш. Он қадар ширин бошад, ки кас аз он сер нагардад ва ҳатман такрорӣ аз он ғизо нӯш карданро бихоҳад.

- Шумо имрӯз аз шоираҳое маҳсуб мешавед, ки дар ҷодаи хеш хеле муваффақед. Мегуфтед, ки сирри комёбии Шумо дар чист?

- Асрори комёбиҳоро дар ду чиз мебинам. Аввалан дар ишқ. Ман як зани ошиқам ва рӯзу рузгори худро бе ишқ тасаввур намекунам. Каси ошиқ мисоли оина ҳамеша аз ғубор ҳазар дорад. Мусаффо будан, ҷило бахшидан, ғалаба бар муқобили натофтан аст.

Дуввум, ман вақти бисёреро аз даст додаам, вақте ки дар хона менишастам ва фаъолият надоштам дар эҷод. Аз ин рӯ, вақти аз даст рафтаро ҷуброн мебояд. Аҷала дорам думболи вақт! То баҳри ҳаводорони шеъри воло чизҳои хубе гуфта бошам.

- Эҷодкор кадом вақт худро муваффақ меҳисобад?

- Он вақт, ки ӯро дар кӯчаву бозор шиносанд. Вақте аз пушт гурӯҳи одамон пичиррос мезананд, ки “Фалонӣ нест?”. Вақте муҳаббати одамонро ба даст меорад! Шоир аз интихобшудаҳост. Шоирӣ кори Худост. Аз ин рӯ, шоир ҳаққи ғалат ва иштибоҳро надорад. Ҳарфи гуфтаи шоир пеши Худо ҷавобгарӣ дорад! Агар эҷодкор бигӯяд, ки ман беҳтарин ҳарфро гуфтаам, оғози марги истеъдодаш фаро расидааст.

- Шеъри имрӯзаи мо дар кадом сатҳ қарор дорад?

- Шеъри имрӯза шеъри талош аст. Он қадар баъзан талошҳо ғалат сурат мегиранд, ки барои тозатарин маъноро гуфтан тасвирҳо хандадортар мешаванд. Шоир интихобшуда аст гуфтем. Пас агар ҳамин аст, зеҳн аз ҷониби интихобгар худаш ҳарфҳоеро, ки бояд бирезад, мерезад.

- Ба назари Шумо, зинаҳои расидан то ба қуллаи мурод кадомҳоянд?

- Зинаҳои ороста аз қолини самимият. Зери қадам, рӯ-рӯи ин зина ҳар рӯз пошидани баргҳои самимияту меҳр, нияти неку дили пок. Ба назари ман ҳамин аст зинаҳои расидан ба фатҳи қуллаи мақсуд. Ҳар нафар чун аз ин гуфтаҳо кор бигирад, пас, ӯро дар оянда комёбиҳо ҳатман истиқбол хоҳанд кард.

- Ба ҷавононе, ки майл ба эҷод доранд, чӣ тавсия медиҳед?

- Ҳоло ки ҷавонанд, аз аҳли эҷод китоб бихонанд. Бештару бештар. Чун вақте эҷодкор дар майдони талош дастболо шуд, ба майдонҳои калонтар роҳ меёбад. Он ҷо баҳсҳо, суҳбатҳоест, ки ҳатман аз ту заминадориро талаб мекунад. Замина бояд дар давраи ҷавонӣ мустаҳкам рехта шавад. Ҳатман бо мутолиаи китоб!

- Роҷеъ ба эълон гардидани соли 2017 ҳамчун “Соли ҷавонон” чӣ назар доред?

- Ҷавонон ҳар рӯз бояд ид дошта бошанд.Чанд соле, ки дар ҳаёти одамӣ онро ҷавонӣ меноманд, ҳар як нафасашро бояд ғанимат шуморанд. Чун солҳои ҷавонӣ бебозгаштанд. “Соли ҷавонон” эълон шудани ин сол фақат таконест, ҳушдорест ба ҷавонон ки ҳар лаҳзаро босамар истифода бикунанд. Ҷавонӣ оғози раҳи муваффақиятҳо дар ҳаёти инсон аст. Давраест, инсон худашро бояд бисозад. Имкон дорад, барои шикастани армонҳои худаш хиштҳоро аз сари ақл моҳирона бичинад. Дар ин ҳолат муваффақиятҳои минбаъда худ ноогоҳ хонаеро хоҳад монд, ки, ба қавле, “Аз боду борон наёбад газанд”. Ҷавонон аз ҳар имконот бояд истифода баранду илму ҳунар омӯзанд ва роҳи ояндаи худро мушаххас созанд. Инчунин, онҳоро мебояд пеши худ мақсад дошта бошанд. Зеро вақте мақсад дар зиндагӣ муайян аст, роҳи расидан ба орзуҳо кӯтоҳтар хоҳад буд.

Беҳрӯз ХОЛМУРОДОВ, “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31 1 2 3 4

Август 2022 c.