Дирӯз - 8 апрел дар Донишкадаи тарбияи ҷисмонии Тоҷикистон ба номи С. Раҳимов ҷашни байналмилалии Наврӯз бо ҳама унсурҳои миллӣ таҷлил гардид.

Дар чорабинии бошукӯҳи идона роҳбарияти Кумитаи кор бо ҷавонон ва варзиши назди Ҳукумати Ҷумҳурии Тоҷикистон, роҳбарону намояндагони идораҳои давлативу ҷамъиятӣ, роҳбарият ва ҳайати васеи омӯзгорону донишҷӯёни Донишкада иштирок намуданд.

Нахуст, роҳбарияти Кумита ва ҳайати меҳмонон пеш аз оғози чорабинӣ дар майдони ҷашнгоҳи наврӯзии Донишкада аз гӯшаҳои намоишӣ боздид намуда, ба намоиши таомҳои миллӣ, хони наврӯзии ҳафтсину ҳафтшин, намоиши ҳунарҳои мардумӣ ва бозиҳои миллии варзишӣ, ки омӯзгорону донишҷӯён ба ифтихори ин ҷашни оламафрӯз оростаанд баҳои баланд доданд.

Чорабинии идона бо садои карнаю сурнай ва оҳангҳои ҷазоби баҳорӣ оғоз ёфта, дар маросими ифтитоҳи қисми расмии он Зулфиқор Гулаҳмадзода, Раиси Кумитаи кор бо ҷавонон ва варзиш суханронӣ карда, ин ҷашни бошукӯҳро ба кулли устодону донишҷӯён табрик кард.

Сипас, гурӯҳи ҳаваскорон бо суруду оҳангҳои ҷаззоб, саҳнаҳои пурҳикмати баҳорӣ ва рақсу тараби ҷавонӣ фазои чорабиниро гарму мунаввар сохтанд.

Ҳамзамон, миёни меҳмонону иштирокчиёни чорабинии идона бозиҳои гуногуни варзишӣ роҳандозӣ гардида, ҷашнгоҳи наврӯзии Донишкада зери унвони “Баҳори ҷавонӣ – Наврӯзи ҷаҳонӣ” давоми рӯз мунаввару хотирмон гардид.