25-уми июни соли ҷорӣ Муассисаи давлатии “Тоҷикфилм” ба хотири таҳияи филмҳои гуногунжанр, дарёфти истеъдодҳои нав ва ҷалби ҷавонони эҷодкор ба соҳаи синамо дар кинотеатри ба номи Тоҳир Собиров Питчинг-рӯнамоии лоиҳаҳои синамоиро доир менамояд.

Дар ин хусус сомонаи “Тоҷикфилм” хабар медиҳад.

Бино ба иттилои манбаъ лоиҳаҳои синамоӣ барои филми ҳунарии пурра, филми кутоҳи бадеӣ, филми мустанад ва филми тасвирӣ ба таври аёнӣ (слайд-шоу) рӯнамоӣ ва муаррифӣ мегарданд.

Ҳамчунин продюссерон, намояндагони ширкатҳои филмбардорӣ ва шабакаҳои телевизионӣ, ки хоҳиши филмофарӣ доранд, метавонанд дар раванди баргузории Питчинг-рӯнамоии лоиҳаҳои синамоӣ иштирок намоянд.

Лозим ба зикр аст, ки лоиҳаҳои синамоӣ то 24-уми июн дар Муассисаи давлатии “Тоҷикфилм” кӯчаи Беҳзод, 25, шуъбаи умумӣ, ошёнаи дуюм қабул карда мешаванд.

Гулафшон КАРИМОВА, “ҶТ”