ФАРҲАНГ
Ҷумъа 20 Май 2022 10:23
8317
Ӯро ду ном аст: Фирдавс ва Восеъ. Ва дар канори онҳост Fernando. Пурҳунар аст. Гӯӣ барои ҳар ном ҳунареро дорост: Фирдавс – ороишгар, Восеъ – рангпардоз ва Фернандо (Fernando) – аксбардор.

Замоне дунё аз ӯ меҳмондорӣ карда, ки аз шӯриши Восеи қаҳрамон сад сол сипарӣ гашта буд. Падар варо Восеъ номид, ба умеди қаҳрамонӣ дар майдони фарохи ҳунар. Майдоне, ки як тан бо се ном ҷойгоҳеро аз худ хоҳад намуд. Аммо модар ӯро Фирдавс ном кард ва хато низ накард: ӯ ҳамакнун боғбонеро мемонад, ки соҳиби боғи сарсабз ва боровари ҳунар аст. Шояд ном шафоат карда, ки имрӯз Фирдавс Набиевро ба унвони як ҷавони ҳунарманд ва пуркор мешиносанд. Ва муҳимтар аз ҳама ҳамчун аксбардор.

Шуҳрати Фирдавс тавъам аст, ба “Тоҷикфилм”. Ба ин даргоҳ соли 2008 омад, ба сифати ороишгари графикӣ. Се сол заҳмат кашиду соли 2011 соҳиби дастгоҳи аксбардории ҳирфаӣ гардид. Акс мебардошт барои завқ. Боҳавас ва роҳат. Соли баъдаш буд, ки Юнус Юсупов барои моли таърих сохтани давраи филмбардории “Марги бегуноҳ” ӯро ба ҳайси аксбардор ҷалб кард. Пешниҳодро пазируфт. Бедудилагӣ, хоҳишмандона ва ризоятманд. Ҳамакнун қадамҳои нахустини худро дар ҷодаи синамо мегузошт. Ба унвони аксбардори майдони кино. Фикри пулро ҳам дар сар намепарварид. Танҳо мехост дар филми калон аккосӣ намояд. Кор кард. Таҷриба андӯхт. 7000 сурат гирифт.

Ба бахти ӯ як бахши гурӯҳи корӣ аз Эрон буд ва миёнашон Фарид Пироиш. Ин нафар коргардоне буд, ки солҳои сол аксбардорӣ мекард. Шинос шуданд. Пешниҳоди хубе аз коргардони эронӣ садо дод: “Ҳар рӯз аксҳоятро бароям нишон медиҳӣ ва ман онҳоро арзёбӣ хоҳам кард”. Боз ҳам пазируфт. Ва низ соҳиби тахаллус гашт: Фернандо (Fernando). Гӯӣ сарнавишт барояш меҳрубониҳое мекард. Омӯхт. Хатоҳояшро дарк кард. Тавсияҳое гирифт. Акнун сатҳи аксбардорияш боло мерафт. Аксҳояш ҳамаро писанд меомад. Дар миёни синамогарон маъруф мешуд. Ҳар кӣ филм гирифтан мехост, ӯро номзад мекард. Ҳамакнун роҳаш боз мешуд. Кораш барор мегирифт. “Ойинаи беҷило”-ро ҷилодор, “Сафари ҳавоӣ”-ро хотирмон, “Рақси зиндагӣ”-ро мондагор, “Муаллим”-ро азиз ва “Маро бубахш”-ро баёдмонданӣ сохт. Расо дар 25 филм ӯро дурбин ҳамдами дерин, рафиқи шафиқ ва азизи дил буд. Медид ва рӯи навори дурбин сабт мекард ва хотирасозӣ.

Кори дасти гулаш коргардонҳои хориҷиро низ мафтун кард. Даъват гардид ба ҳамкорӣ. Ба лоиҳаҳои бузург. Аз Инглистону Фаронса. Андар хоки Тоҷикистон. Се лоиҳаи хориҷӣ дурбинашро ба дуриҳо бурд. Касбияташ боло рафт. Ҳамчун аксбардори гузоришгар.

Фирдавс дунёи рангини худро маҳдуд надид ва оҳиста-оҳиста майле кард ба самти нав. Самте, ки рӯзе номашро пуровоза месозаду ситораҳоро ба суроғаш хоҳад овард ва дари утоқашро хоҳанд кӯфт. Кунун ҳар гоҳ ки аз гирудори рӯзгор, ташвишҳои кор ва хастагӣ раҳо шудан мехост, ба даври гарданаш дурбинро меовехт. Ва ҳамкорони хушгилашро лавҳа месохт.

Меҳраш ба ин риштаи аксбардорӣ рӯз то рӯз мефузуд. Талош мекард, бештар омӯзад, хонад, донад ва андӯхтаҳояшро ба кор барад. Дар давраҳои омӯзишии зиёд иштирок кард. Мактабҳои номдори хориҷиро гузашт. Пул харҷ намуд. Аммо рӯзе ниҳоят ба дардаш хӯрд.

Дигар ӯ бештар лавҳа мегирад. Мехоҳад зебоӣ биофарад ва одамиро ошиқ бисозад. Ба зиндагӣ. Ба одамӣ...

Қадам ба қадам номвар мешуд, шумори пайнавардонаш дар сафҳаи инстаграмаш мешитофт ба ҳазор, даҳ ҳазор, бист, сӣ ва дар ниҳоят чил ҳазор. Ва хостгори ҳунараш низ бешумор. Ҳунари варо ҳамчунин бипарастанд ситораҳо. Аз дохил то хориҷ. Ашхоси хушсимову хушнамо. Аз Нозияи Кароматуллоҳ то Зулайхои Маҳмадшоҳ, аз Нигинаи Амонқул то Сито Қосимӣ. Вопасӣ орзуманди бо худ бурдани ӯро ба шаҳри Дубай аст. То зебоиҳоро зеботар, хушгилеро хушгилтар ва нозанинеро нозанинтар бинамоёнад...

Кунун аксҳои ситораҳоро бигрифтаи ӯ зеб диҳад тоблуву овезаҳоро. Маҷаллаву нашрияҳо низ гоҳи мусоҳиба бо ситораҳо, нашр кунанд аксҳои зебобигрифтаи варо. Чун самимӣ гирифта шудаанд, халлоқона эҷод шудаанд ва дорои қисса ҳастанд. Қиссаи ногуфтаи ситораҳо, ки дар осмони ҳунар чашмакзанӣ мекунанд...

Ҳунари Фирдавсро кайҳо писандидаанд, корашро эътироф намудаанд ва ҳанӯз варо ба алоқамандони шоҳкор тавсия диҳанд. Вале ӯ аз ин баҳо қаноатманд нест. Ширкат меварзад дар озмунҳои байналмилалии аккосӣ. Ҷашнвораҳои байналмилалӣ. “35AWARDS” барояш ҷашнвораест пур аз ангезиш. Мамлуст аз ғоя. Хазинаи беинтиҳоест баҳри рангин сохтани дунёи эҷодӣ. Ба ин озмун 12 корашро равон намуд. 10 аксаш мавриди таваҷҷуҳи ҳайати ҳакамон аз 50 кишвари дунё қарор гирифт ва ба марҳилаи сеюм роҳ ёфт. Ҳадаф дорад, дар садгонаи беҳтарин аксбардор ва ё садгонаи акси беҳтарин номҷӯӣ кунад. Ва низ номҷӯӣ кунад аз барои Тоҷикистон...

Тасмим дорад, дар кораш устод бошад. Пешрафт кунад. Бисабзад. Устувор гардад. Мутахассиси шоистаи сатҳи ҷаҳонӣ шавад. Тоҷики сарбаланди меҳан бошад. Аммо бимонад танҳо дар Тоҷикистон. Чун ватандӯст аст. Дурандеш аст. Дилсӯз аст. Ба ҳунару синамои миллӣ. Ва низ миллигаро.

Бовар дорем, дар наздиктарин фурсат парчамбардори кишвару меҳан ва мардуми пурҳунари тоҷик хоҳад гашту сабади эҷодияш борвар...

Ардашер ПАЙВАНД,
“ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
25 26 27 28 29 30 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

Май 2022 c.