Таҳти ин унвон дар тарабхонаи Чакан бахшида ба Рӯзи забони давлатии Ҷумҳурии Тоҷикистон барномаи адабӣ –ҳунарӣ бо иштироки шоири шинохтаи кишвар Ато Мирхоҷа Неру баргузор гардид.

Барномаи адабӣ-ҳунарӣ бо сарпарастии Кумитаи кор бо ҷавонон ва варзиши назди Ҳукумати Ҷумҳурии Тоҷикистон доир гардида, дар он дар баробари шоири шинохтаи кишвар Ато Мирхоҷа, адибони саршинос, аҳли илму адаби кишвар ва ҷавон иштирок доштанд.

Дар рафти чорабинӣ ҷавонон аз эҷодиёти ӯ шеърҳо қироат намуда, дар ин баробар сарояндагон аз чакидаҳои хомаи ӯ барои ҳозирин сурудҳо сароиданд. Худи шоир бошад, аз аёми ҷавонӣ қиссаву достонҳо пандомӯзе барои иштирокчиён, ба вижа ҷавонон ҳикоят кард.

Дилноза Аҳмадзода, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, зимни суханронии хеш ҳозиринро ба рӯзи забони давлатӣ табрику таҳният намуда, аз Ато Мирхоҷа ба хотири даъвати эшонро пазируфтан изҳори хушнудӣ кард.

Дар фарҷоми барнома шоири шинохтаи кишвар Ато Мирхоҷа Неру ба ҷавонон китобҳои хешро ҳамчун армуғон ба ҷавонон тақдим кард.