Бонки миллии Тоҷикистон дар соли 2022 сиёсати қурбиро тибқи реҷаи “шинокунандаи танзимшаванда, бе муайян ва эълон кардани ҳудудҳои тағйирёбии қурб” идома дода, дар ин давра қурби расмии пули миллӣ нисбат ба доллари ИМА ба андозаи 9,7 фоиз аз 11,3000 сомонӣ дар 31 декабри соли 2021 то ба 10,2024 сомонӣ дар 31 декабри соли 2022 устувор гардид.

Ин нуктаро Ҳоким Холиқзода, раиси Бонки миллии Тоҷикистон 15 феврал дар нишасти матбуотӣ баён намуд.

Гуфта шуд, ки дар давоми соли 2022 қурби пули миллӣ дар маҷмӯъ дар сатҳи муътадил қарор дошта, нисбати асъорҳои озод табдилшаванда ва шарикони савдо, аз ҷумла нисбат ба лираи Туркия ба андозаи 36,5 фоиз, рубли Беларус 31,2 фоиз, тангаи Қазоқистон 16,7 фоиз, юани Чин 15,9 фоиз , евро 14,9 фоиз, сӯми Узбекистон 12,9 фоиз, соми Қирғизистон 10,7 фоиз, доллари ИМА 9,7 фоиз ва рубли русӣ 4,1 фоиз устувор гардидааст.