Ориф Хоҷазода, раиси Кумитаи давлатии идораи замин ва геодезии Ҷумҳурии Тоҷикистон дар нишасти матбуотии худ имрӯз - 6 феврал хабар дод, ки қонунвайронкуниҳо дар самти истифодаи замин кам гардидааст.

Бино ба иттилои раиси Кумита соли 2024 ҳамагӣ 12 ҳазору 554 ҳолати вайронкунии қонунгузории замин ошкор гардидааст, ки нисбат ба соли 2023 361 ҳолат кам аст.

Инчунин барои бартараф намудани қонунвайронкуниҳои ошкоршуда 11 ҳазору 296 қарор қабул гардид, ки дар муқоиса бо соли 2023 72 адад зиёд мебошад.

Ҳамзамон, ба қавли Ориф Хоҷазода дар натиҷаи андешидани чораҳои мушаххас 9445 ё ин 75 фоизи ҳолати қонунвайронкунӣ бартараф карда шуданд. Дар маҷмуъ аз маблағи умумии ҷарима 6 миллиону 946 ҳазор сомонӣ, ки аз тарафи нозирон нисбати вайронкунандагони қонунгузории замин таъин гардида буд, 5 миллиону 669 ҳазору 372 сомонӣ (81,6%) ба суратҳисоби махсуси Кумитаи давлатӣ ва мақомоти маҳаллии он ворид шудааст, ки нисбат ба соли 2023 ба маблағи 526 ҳазору 524 сомонӣ зиёд мебошад. Илова бар ин, барои додани баҳои ҳуқуқӣ 1025 мавод ба прокуратура ва 911 мавод барои бо таври маҷбурӣ ситонидани маблағи чаримаҳо ба Хадамоти иҷро ирсол гардидааст.